یوتھ افیئرز اینڈ سپورٹس ڈیپارٹمنٹ پنجاب کے سالانہ سپورٹس کیلنڈر کے تحت انٹر ڈسٹرکٹ ڈویژنل ہاکی چیمپئن شپ (کل )منعقد ہوگی

جمعرات 13 اگست 2026 20:09

ملتان (اُردو پوائنٹ اخبارتازہ ترین - اے پی پی۔ 13 اگست2026ء) یوتھ افیئرز اینڈ سپورٹس ڈیپارٹمنٹ پنجاب کے سالانہ سپورٹس کیلنڈر کے تحت انٹر ڈسٹرکٹ ڈویژنل ہاکی چیمپئن شپ (کل) 14 اگست کو ملتان میں منعقد ہوگی۔ ڈویژنل سپورٹس آفیسر ملتان عطاالرحمن خان کے مطابق وزیر اعلیٰ پنجاب مریم نواز شریف کے ’’یوتھ ایئر 2026‘‘ کے سلسلے میں ہاکی چیمپئن شپ کا انعقاد کیا جا رہا ہے۔

انہوں نے بتایا کہ وزیر کھیل پنجاب ملک فیصل ایوب کھوکھر، سیکرٹری سپورٹس فضل الرحمن اور ڈائریکٹر جنرل سپورٹس محمد طارق قریشی کی ہدایات پر مرتب کیے گئے سالانہ سپورٹس کیلنڈر کے تحت پہلے تحصیل سطح پر ہاکی کے مقابلے منعقد کیے گئے، جس کے بعد اب ڈسٹرکٹ سطح پر انٹر ڈسٹرکٹ ڈویژنل چیمپئن شپ کا انعقاد کیا جا رہا ہے۔

(جاری ہے)

چیمپئن شپ میں ملتان ڈویژن کے چاروں اضلاع ملتان، وہاڑی، خانیوال اور لودھراں کی ہاکی ٹیمیں شرکت کریں گی۔

تمام ٹیمیں دی اسٹیٹ آف دی آرٹ ملتان آسٹرو ٹرف ہاکی اسٹیڈیم میں اپنی صلاحیتوں کا مظاہرہ کریں گی۔ مقابلوں کے دوران کھلاڑیوں کو بہترین کھیل پیش کرنے کے لیے بھرپور مواقع فراہم کیے جائیں گے۔ ڈویژنل سپورٹس آفیسر عطاالرحمن خان نے کہا کہ نوجوانوں کو کھیلوں کی سرگرمیوں کے لیے سازگار ماحول فراہم کرنا حکومت پنجاب کی ترجیحات میں شامل ہے۔ ہاکی چیمپئن شپ کے ذریعے نوجوان کھلاڑیوں کی صلاحیتوں کو اجاگر کرنے اور انہیں آگے بڑھنے کے مواقع فراہم کرنے میں مدد ملے گی۔ چیمپئن شپ کا فائنل میچ شام 7 بجے کھیلا جائے گا، جس کے مہمان خصوصی کمشنر ملتان ڈویژن عامر کریم خان ہوں گے۔ کمشنر ملتان ڈویژن کامیاب ٹیموں اور کھلاڑیوں میں انعامات بھی تقسیم کریں گے۔