متحدہ عرب امارات کی ہاسپیٹیلٹی انڈسٹری میں پائیداری کے فروغ کے لیے اہم پیش رفت

اعجاز احمد گوندل بدھ 2 ستمبر 2026 17:17

متحدہ عرب امارات کی ہاسپیٹیلٹی انڈسٹری میں پائیداری کے فروغ کے لیے Emirates Hospitality Sustainability Alliance (EHSA) کا باضابطہ آغاز کردیا گیا۔ یہ اقدام Emirates Environmental Group (EEG) کے زیرِ اہتمام شارجہ کے Coral Beach Resort میں منعقدہ تقریب کے دوران سامنے آیا۔
تقریب میں ابوظہبی سے فجیرہ تک متحدہ عرب امارات کی مختلف ریاستوں سے تعلق رکھنے والے ہوٹل انڈسٹری کے نمائندگان اور ماہرین نے شرکت کی، جو ہاسپیٹیلٹی سیکٹر میں ماحول دوست اقدامات کے لیے مشترکہ عزم کی عکاسی کرتا ہے۔

اس موقع پر شرکاء نے اس امر پر زور دیا کہ پائیداری کو انفرادی ہوٹلوں کی محدود سرگرمیوں تک رکھنے کے بجائے اسے اجتماعی، قابلِ پیمائش اور جوابدہ صنعتی تحریک میں تبدیل کرنے کی ضرورت ہے۔
تقریب کے دوران Bio Digestor Machine اور Glass Bottle Plant کے پائلٹ منصوبوں کو بھی ہوٹل انڈسٹری سے وابستہ شرکاء کے سامنے پیش کیا گیا، تاکہ ہاسپیٹیلٹی سیکٹر میں ماحول دوست ٹیکنالوجیز کے وسیع تر استعمال کی حوصلہ افزائی کی جاسکے۔

(جاری ہے)

Emirates Environmental Group کی شریک بانی اور چیئرپرسن ڈاکٹر حبیبہ المرعشی نے اس اقدام کو پائیداری کے سفر کا آغاز قرار دیتے ہوئے کہا کہ یہ پلیٹ فارم علم کے تبادلے، صلاحیتوں میں اضافے اور ہاسپیٹیلٹی آپریشنز، ادارہ جاتی ثقافت اور مہمانوں کے تجربے میں پائیداری کو شامل کرنے میں معاون ثابت ہوگا۔
تقریب میں اس عزم کا اظہار بھی کیا گیا کہ متحدہ عرب امارات کے ہوٹل ایک دوسرے سے الگ الگ کام کرنے کے بجائے باہمی تعاون کے ذریعے پائیدار ہاسپیٹیلٹی کے مشترکہ اہداف حاصل کریں گے۔
شرکاء کے مطابق EHSA کا پلیٹ فارم متحدہ عرب امارات کی ہاسپیٹیلٹی انڈسٹری کو ماحولیاتی ذمہ داری، وسائل کے مؤثر استعمال اور پائیدار کاروباری طریقوں کے فروغ کے لیے ایک مشترکہ سمت فراہم کرے گا۔