گلشن اقبال میں شہری سے اسلحے کے زور پر لوٹ مار

ریلوے سوسائٹی میں موٹر سائیکل سوار 2 ملزمان نے شہری سے موبائل فون اور نقدی چھین لی، واردات کی ویڈیو سامنے آگئی

جمعہ 4 ستمبر 2026 21:45

کراچی (اُردو پوائنٹ اخبارتازہ ترین - این این آئی۔ 04 ستمبر2026ء) کراچی کے علاقے گلشن اقبال 13 ڈی ریلوے سوسائٹی میں موٹر سائیکل سوار مسلح ملزمان نے شہری کو لوٹ لیا، واردات کی سی سی ٹی وی ویڈیو بھی سامنے آگئی۔موصولہ ویڈیو میں دیکھا جاسکتا ہے کہ ایک نوجوان گلی میں موبائل فون استعمال کرتے ہوئے جارہا ہے کہ اسی دوران موٹر سائیکل پر سوار دو ملزمان اس کے قریب پہنچتے ہیں۔

سی سی ٹی وی فوٹیج کے مطابق دونوں ملزمان نے چہرے چھپانے کے لیے ہیلمٹ پہن رکھے تھے۔

(جاری ہے)

ملزمان نے شہری کو روک کر اس سے موبائل فون اور نقدی چھینی اور چند لمحوں میں واردات مکمل کرنے کے بعد موٹر سائیکل پر فرار ہوگئے۔فوٹیج میں دیکھا جاسکتا ہے کہ ملزمان نے مبینہ طور پر تقریباً 30 سیکنڈ میں واردات مکمل کی اور شہری کو لوٹنے کے بعد موقع سے فرار ہونے میں کامیاب ہوگئے۔واقعے کی ویڈیو سامنے آنے کے بعد شہریوں نے گلشن اقبال اور اطراف کے علاقوں میں بڑھتی ہوئی وارداتوں پر تشویش کا اظہار کرتے ہوئے پولیس سے گشت اور نگرانی کا نظام مزید مؤثر بنانے کا مطالبہ کیا ہے۔