شیخ شبیر کا قتل بڑا سانحہ، قاتل عبرت کا نشان بنیں گے‘رانا تنویر حسین

مقتول کے خون کو رائگاں نہیں جانے دیں گے، آئی جی پنجاب اور سی سی ڈی سربراہ سے رابطہ، مریدکے کو جلد سیف سٹی بنانے کا اعلان

ہفتہ 12 ستمبر 2026 19:30

مریدکی(اُردو پوائنٹ اخبارتازہ ترین - این این آئی۔ 12 ستمبر2026ء) وفاقی وزیر فوڈ سکیورٹی ریسرچ رانا تنویر حسین نے سابق چیئرمین بلدیہ مریدکے و مرکزی چیئرمین شیخ شبیر احمد کے اندھے قتل پر شدید برہمی کا اظہار کیا ، انہوں نے آئی جی پولیس پنجاب اور سی سی ڈی سربراہ سے رابطہ کر کے قاتل جلد گرفتار کرنے کا مطالبہ کیا ۔

(جاری ہے)

مریدکے میں مقتول شیخ شبیر کے جنازہ کے بعد گفتگو کرتے وفاقی وزیر رانا تنویر حسین نے کہا کہ شیخ شبیر کا قتل بہت بڑا سانحہ ہے پورا شہر سوگ میں ڈوب گیا ہے ،شیخ شبیر نے ہمیشہ ہر ایک سے پیار کیا وہ مسلم لیگ (ن) کے مخلص ساتھی تھے جبکہ تاجر برادری کی آنکھ کا تارا تھے انکی خدمات یاد رکھی جائیں گی ،انکا خون رائگاں نہیں جائے گا اور قاتل عبرت کا نشان بنیں گے ۔

انہوں نے کہا مریدکے میں ہونے والے جرائم پر انہیں تشویش ہے اس سلسلہ میں وزیر اعلیٰ پنجاب ،آئی جی پولیس پنجاب سے بھی بات کی ہے ،یہ میرا شہر ہے اور ہر شہری کی جان و مال کی حفاظت کی جائے گی ،جلد شہر کو سیف سٹی میں تبدیل کردیا جائے گا۔