پنجاب میں اے آئی کریکولم اور ٹریننگ انیشیٹو کا آغاز

1 لاکھ 60 ہزار سے زائد اساتذہ کو اے آئی کی تربیت دی جائیگی‘علی ڈار

ہفتہ 26 ستمبر 2026 18:44

لاہور (اُردو پوائنٹ اخبارتازہ ترین - این این آئی۔ 26 ستمبر2026ء) پنجاب میں مصنوعی ذہانت کے دور کے تقاضوں سے ہم آہنگ تعلیمی نظام کی جانب اہم پیش رفت، اے آئی کریکولم اور ٹریننگ انیشیٹو کا آغاز کر دیا گیا۔ پروگرام کے تحت پنجاب کے 1 لاکھ 60 ہزار سے زائد اساتذہ کو اے آئی کی تربیت دی جائے گی تاکہ وہ جدید ٹیکنالوجی کو تدریس اور طلبہ کی تعلیمی ضروریات کے لیے مؤثر انداز میں استعمال کر سکیں۔

مشیر وزیراعلیٰ پنجاب برائے اے آئی و خصوصی اقدامات علی ڈار افتتاحی پروگرام میں بطور مہمانِ خصوصی شریک ہوئے۔وزیراعلیٰ مریم نواز شریف کے وژن کے مطابق پنجاب کے تعلیمی نظام کو اے آئی کے دور کے تقاضوں سے ہم آہنگ کرنے کے عزم کا اظہار کرتے ہوئے علی ڈار نے کہا کہ اے آئی کریکولم پنجاب میں تعلیم حاصل کرنے والے لاکھوں بچوں کو مستقبل کی ٹیکنالوجی، ڈیجیٹل معیشت اور نئے روزگار کے مواقع کے لیے تیار کرنے میں مددگار ثابت ہوگا۔

(جاری ہے)

علی ڈار نے کہا کہ 1 لاکھ 60 ہزار سے زائد اساتذہ کی اے آئی تربیت پنجاب کے تعلیمی شعبے میں ایک بڑی تبدیلی کی بنیاد بنے گی۔ اس تربیت کے ذریعے اساتذہ جدید اے آئی ٹولز کو تدریس میں ذمہ دارانہ اور مؤثر انداز میں استعمال کرنے کے قابل ہوں گے۔علی ڈار نے کہا کہ اے آئی صرف ایک ٹیکنالوجی نہیں بلکہ مستقبل کی تعلیم اور روزگار کی بنیادی مہارت بن رہی ہے۔

نئے اے آئی کریکولم کا مقصد طلبہ میں ڈیجیٹل اور اے آئی مہارتیں پیدا کرنا اور انہیں مستقبل کے مواقع کے لیے تیار کرنا ہے۔انہوں نے مزید کہا کہ اے آئی تعلیم کو زیادہ مؤثر، جدید اور طلبہ کی ضروریات کے مطابق بنانے کے نئے مواقع فراہم کر رہی ہے، جبکہ ذمہ دارانہ اے آئی استعمال اور ڈیجیٹل مہارتوں کو پنجاب کے تعلیمی نظام کا حصہ بنایا جا رہا ہے۔اس اقدام پر اسکول ایجوکیشن ڈیپارٹمنٹ، پیکٹا، پی ایم آئی یو-پی ای ایس آر پی، یونیسیف اور آفس آف اے آئی مشترکہ طور پر کام کر رہے ہیں۔