ڈی آئی جی آپریشنز کا لاہور کے گرجا گھروں کا دورہ

لاہور(اُردو پوائنٹ اخبارتازہ ترین - این این آئی۔ 26 مئی2024ء) ڈی آئی جی آپریشنز لاہورمحمد فیصل کامران نے شہر کے مختلف گرجا گھروں کا دورہ کیا اور وہاں کی انتظامیہ سے بھی ملاقات کی۔محمد فیصل کامران نے کہا کہ لاہور پولیس اقلیتوں کے حقوق اور جان و مال کی حفاظت کے کیے کو دقیقہ فروگذاشت نہیں رکھے گی۔انہوں نے کہا کہ امن و مان کا قیام لاہور پولیس کی اولین ترجیحات میں شامل ہے۔

گرجا گھروں کی حفاظت یقینی بنانے کے لیے فول پروف انتظامات عمل میں لائے گئے ہیں۔ڈی آئی جی آپریشنز نے کہا کہ صوبائی دارلحکومت میں گرجا گھروں کی سکیورٹی پر لاہور پولیس کے 01 ہزار کے قریب افسران واہلکار تعینات کیے گئے ہیں۔محمد فیصل کامران نے ڈیوٹی پر تعینات پولیس اہلکاروں سے ملاقات کی اور ان کو سکیورٹی ڈیوٹی بارے بریفنگ سمیت الرٹ ہو کر فرائض سرانجام دینے کی ہدایت بھی کی۔

(جاری ہے)

انہوں نے کہا کہ شہر کے انٹری پوائنٹس پر موجود جوان الرٹ ہو کر ڈیوٹی کے فرائض سر انجام دیں۔ محمد فیصل کامران نے کہا کہ بغیر تلاشی گرجا گھر وں کے اندر داخلہ ممنوع ہے،داخلے سے قبل ہر فرد کی تلاشی یقینی بنائی جائے۔انہوں نے کہا کہ سپروائزری افسران حفاظتی انتظامات خود چیک کریں۔گرجا گھروں کی سکیورٹی پر تعینات جوان گردونواح پر کڑی نظر رکھیں۔

ڈولفن،پی آریواور تھانوں کی گاڑیاں موثرگشت جاری رکھیں۔علاوہ ازیں ڈی آئی جی آپریشنز لاہورمحمد فیصل کامران نے کہا ہے کہ شہریوں کی جان ومال کی حفاظت کے ساتھ ساتھ سہولیات کی فراہمی یقینی بنائی جارہی ہے۔ پولیس خدمت مراکز کے ذریعے ایک ہی چھت تلے 15 مختلف سہولیات فراہم کی جارہی ہیں۔ رواں ہفتے کے دوران موبائل پولیس خدمت مرکز پہلی شفٹ پیر کو احمد ٹریولر شفیق آباد، منگل کو مین بازار شاہدرہ، بدھ کولوہے والی پلی بادامی باغ،جمعرات کو کلب چوک شاد باغ اور جمعہ کواسلام پورہ میں موجود ہو گی جبکہ دوسری شفٹ بروزپیر سبزی منڈی بادامی باغ،منگل کوبیگم کوٹ شاہدرہ ٹان،بدھ کو ابوبکر روڈ بادامی باغ، جمعرات کونولکھا بازار اورجمعہ کو مصری شاہ موجود ہوگی۔

محمد فیصل کامران نے کہا ہے کہ موبائل پولیس خدمت مرکز سمیت دیگر پولیس خدمت مراکز بھی سروسز ڈیلیوری کیلئے دن رات کوشاں ہیں۔شہری سہولیات کے حصول کیلئے مطلوبہ دستاویزات ہمراہ لائیں۔ڈی آئی جی آپریشنز نے کہا کہ موبائل خدمت مرکز کا دوشفٹوں میں فراہمی کا مقصد شہریوں کیلئے آسانیاں پیدا کرنا ہے۔