آئی جی پنجاب کی پولیس ملازمین اور انکے اہلخانہ سے ملاقات

ْڈاکٹر عثمان انور نے پولیس ملازمین کی پیش کردہ درخواستیں اور مسائل سن کر احکامات جاری کئے

بدھ 24 اپریل 2024 19:55

لاہور (اُردو پوائنٹ اخبارتازہ ترین - این این آئی۔ 24 اپریل2024ء) انسپکٹر جنرل پولیس پنجاب ڈاکٹر عثمان انور کی جانب سے پولیس ملازمین اور انکے اہل خانہ کی ویلفیئر کیلئے ترجیحی اقدامات جاری ہیں جس سے ملازمین اور انکے اہل خانہ کو درپیش ہر قسم کے مسائل کا ترجیحی بنیادوں پر حل ممکن ہو رہا ہے ۔ آئی جی پنجاب ڈاکٹر عثمان انور نے سنٹرل پولیس آفس میں پولیس ملازمین اور انکے اہلخانہ سے ملاقات کی اور پولیس ملازمین کی پیش کردہ درخواستیں اور مسائل سن کر احکامات جاری کئے۔

آئی جی پنجاب نے ہیڈ کانسٹیبل عرفان علی مرحوم کے بیٹے کی بھرتی کی درخواست پر اے آئی جی ایڈمن کو ریلیف فراہم کرنے کا حکم دیا۔ڈاکٹر عثمان انور نے کانسٹیبل محمد خالد رشید کی سروس بحالی کی درخواست ڈی آئی جی اسٹیبلشمنٹ ٹو کو نظر ثانی کیلئے بھجوا دی۔

(جاری ہے)

آئی جی پنجاب نے سرگودھا کے ہیڈ کانسٹیبل کی اہلیہ کی جانب سے مالی امداد کی درخواست پر آر پی او سرگودھا کو ریلیف فراہم کرنے کی ہدایت کی ۔

ڈاکٹر عثمان انور نے سرگودھا کے شہری محمد افتخار احمد کی درخواست پر ڈی آئی جی اسٹیبلشمنٹ ٹو کو ذاتی شنوائی کے بعد ریلیف فراہم کرنے کی ہدایت کی ۔ آئی جی پنجاب نے انسپکٹر احمد علی مرحوم کی بیوہ کوثر بی بی کی جانب سے بیٹے کی محکمہ میں بھرتی کی درخواست پر اے آئی جی ایڈمن کو ریلیف فراہم کرنے کا حکم دیا۔آئی جی پنجاب ڈاکٹر عثمان انور نے ہدایت کی کہ پولیس ملازمین اور شہریوں کی پیش کردہ درخواستوں پر فوری ایکشن سے ریلیف فراہم کیا جائے۔ آئی جی پنجاب نے کہاکہ پولیس ملازمین اور شہریوں کو درپیش مسائل کا ازالہ موثر سپرویژن سے مقامی سطح پر یقینی بنایا جائے ۔