ڈی ایس پی کے عہدے پر ترقی پانے والے انسپکٹرز کو پروموشن رینک لگانے کی تقریب

لاہور (اُردو پوائنٹ اخبارتازہ ترین - این این آئی۔ 15 مئی2024ء) انسپکٹر جنرل پولیس پنجاب ڈاکٹر عثمان انور نے ڈی ایس پی کے عہدے پر ترقی پانے والے افسران کے اعزاز میں تقریب منعقد کی جس میں آئی جی پنجاب ڈاکٹر عثمان انور نے 26 پولیس افسران کو ڈی ایس پی عہدے کے رینک لگائے، تقریب میں ترقی پانے والے افسران کے اہل خانہ، بچوں اور عزیز و اقارب نے خصوصی طور پر شرکت کی۔

آئی جی پنجاب ڈاکٹر عثمان انور اور سینئر افسران نے ترقی پانے والے افسران اور ان کے اہل خانہ کو مبارکباد دی، آئی جی پنجاب ڈاکٹر عثمان انور نے نئے ڈی ایس پیز کو سپروائزری رول بارے اہم ہدایات دیں۔آئی جی پنجاب ڈاکٹر عثمان انور نے کہا کہ تمام افسران جدید ایپلی کیشنز، آئی ٹی بیسڈ ماڈرن ٹیکنالوجی کو اپنی پولیسنگ کا لازمی جزو بنائیں، آئی جی پنجاب نے کہا کہ سیف سٹیز اتھارٹی اور آرگنائزڈ کرائم یونٹ کا دائرہ کار بتدریج پنجاب کے تمام اضلاع تک بڑھا رہے ہیں، نئے سیف سٹی پراجیکٹس، آرگنائزڈ کرائم ڈیپارٹمنٹ سے پنجاب پولیس مزید مضبوط، کارکردگی بہتر ہوگی، ڈاکٹر عثمان انور نے مزید کہا کہ ہیومن انٹیلی جنس اور آرٹیفیشل انٹیلی جنس کے اشتراک سے کرائم کنٹرول اور انویسٹی گیشن امور میں بہتری آئی ہے، آئی جی پنجاب نے کہا کہ پروموٹ ہونے والے افسران سے پروفیشنل ذمہ داریاں، انصاف اور بہتر رویوں بارے توقعات بڑھ گئی ہیں، ڈاکٹر عثمان انور نے کہا کہ ایف آئی آر کی اندراج بنیادی چیز ہے جس میں تاخیر کے ذمہ داران کے خلاف کاروائی ڈی ایس پیز کی ذمہ داری ہے۔

(جاری ہے)

نئے ڈی ایس پیز نے پبلک سروس ڈلیوری کو آسان بنانے کے عزم کا اعادہ کیا، ایڈیشنل آئی جی پنجاب سلطان احمد چوہدری، ڈی آئی جی ہیڈ کوارٹرز، ڈی آئی جی اسٹیبلشمنٹ ون اینڈ ٹو، اے آئی جی ایڈمن سمیت دیگر افسران بھی تقریب میں موجود تھے۔