مریضوں، لواحقین کو حشرات زدہ ناقص کھانا کھلانے والی ہسپتال کینٹین بند

لاہور (اُردو پوائنٹ اخبارتازہ ترین - این این آئی۔ 16 مئی2024ء) ہسپتال کھانے کے نام پر بیماریاں فروخت کرنے لگے ،مریضوں، لواحقین کو حشرات زدہ ناقص کھانا کھلانے والی ہسپتال کینٹین بند کر دی گئی ۔ وزیراعلی پنجاب کی ہدایت پر فوڈ سیفٹی ٹیموں کا گرینڈآپریشن جاری ہے ۔ شالیمار لنک روڈ پر واقع ہسپتال کینٹین بند کر کے بدبودار حشرات زدہ گوشت، سبزیاں اور دیگر ناقص اشیا تلف کر دی گئیں ۔

ڈی جی فوڈ اتھارٹی عاصم جاوید نے کہا کہ کینٹین میں ناقص سٹوریج، گندے فریزر، زنگ آلود برتن اور کیڑے مکوڑوں کی بھرمار پائی گئی، فنگس لگے فریزر میں بدبودار گوشت، گلی سڑی سبزیاں موجود پائی گئیں، کھلی نالیاں، گندا واشنگ ایریا اور کاکروچز کی بھرمار پائی گئی۔انتہائی لازم ریکارڈ اور ملازمین کے میڈیکلز عدم موجود پائے گئے۔

(جاری ہے)

ملازمین کی صفائی نا ہونے اور خوراک کی تیاری کے لیے نان فوڈ گریڈ برش کااستعمال کیا جارہے تھا۔

انہوں نے کہا کہ ناقص اجزا سے تیار خوراک کا استعمال انسانی صحت کیلئے انتہائی مضر ثابت ہوتا ہے۔ وزیر خوراک پنجاب کے حکم پر پنجاب کے ہسپتالوں، سکولز، کالجز کی کینٹینز کی مسلسل چیکنگ کی جارہی ہے۔ پنجاب بھر میں ملاوٹ اور جعلسازی مافیا کا قلع قمع کرنے کے لیے فوڈ سیفٹی ٹیمیں ہمہ وقت میدان میں سرگرم ہیں۔ خوراک کی تیاری سے ترسیل تک تمام مراحل کو بین الاقوامی طرز کے مطابق لانے کے لیے اقدامات کر رہے ہیں۔ جعلساز مافیا معاشرے کا ناسور ہیں، خاتمے کے لیے پنجاب فوڈ اتھارٹی کا ساتھ دیں۔