پنجاب بھر میں آٹے، میدے اور سوجی کی قیمتوں میں واضح کمی آ رہی ہے، بلال یاسین

لاہور (اُردو پوائنٹ اخبارتازہ ترین - اے پی پی۔ 23 مئی2024ء) پنجاب بھر میں آٹے،میدے اور سوجی کی قیمتوں میں واضح کمی آ رہی ہے۔وزیر خوراک پنجاب بلال یاسین نے پنجاب بھر کی مارکیٹوں سے قیمتوں کے تقابلی جائزے منگوا لئے۔ صوبائی وزیر کا کہنا تھا کہ گندم سے تیار کردہ اشیا کی قیمتوں میں نمایاں کمی کا سلسلہ جاری ہے اور اس سلسلے میں کڑی نگرانی کی جا رہی ہے۔

بلال یاسین نے بتایا کہ 10 کلو گرام آٹے کی قیمت میں600 سے700 روپے کمی آئی جبکہ20 کلو گرام آٹے کی قیمت میں اوسط 1300 روپے تک کمی ریکارڈ کی گئی ہے۔وزیر خوراک پنجاب نے بتایا کہ 80 کلو فائن آٹا/میدے کی قیمت میں2770 روپے تک کمی ہوئی،اسی طرح50 کلوگرام سوجی کے تھیلے کی قیمت میں اوسط1700 روپے تک کمی ریکارڈ کی گئی ہے۔انہوں نے بتایا کہ فائن آٹے کا تھیلا11 ہزار سے کم ہوکر8 ہزار230 میں دستیاب ہے۔

(جاری ہے)

وزیر خوراک نے بتایا کہ سوجی50 کلوگرام تھیلا7150 سے کم ہو کر5450 میں دستیاب ہے۔وزیر خوراک نے بتایا کہ روزمرہ اشیا ضروریہ کی قیمتوں میں کمی سے عوام کو حقیقی ریلیف ملا ہے۔ بلال یاسین نے کہا کہ گندم کی وافر مقدار میں موجودگی کے ثمرات عام آدمی تک پہنچ رہے ہیں،مارکیٹ کی مستقل چیکنگ سے اشیا کی قیمتوں اور معیاری پر کڑی نظر رکھی جا رہی ہے۔انہوں نے کہا کہ صوبہ بھر میں سستی روٹی کی فراہمی یقینی بنائی جا رہی ہے۔بلال یاسین نے بتایا کہ محکمہ خوراک اور ضلعی انتظامیہ مل کر کم قیمتوں پر عملدرآمد یقینی بنا رہے ہیں۔