لاہور،سی ٹی او کا اپلائیڈ فار ،غیر نمونہ اور بوگس نمبر پلیٹس کے خلاف کریک ڈائون کا حکم

لاہور (اُردو پوائنٹ اخبارتازہ ترین - اے پی پی۔ 27 مئی2024ء) سی ٹی او لاہور عمارہ اطہر نے اپلائیڈ فار ،غیر نمونہ، بوگس نمبر پلیٹس اور نمبر پلیٹس سے چھیڑ چھاڑ کرنے والوں کےخلاف کریک ڈائون کا حکم دے دیا۔ ترجمان سٹی ٹریفک پولیس کے مطابق گاڑی و موٹر سائیکل کی نمبر پلیٹس سے چھیڑ چھاڑ، نمبر غیر واضح اور جعلی نمبر پلیٹس کےخلاف کریک ڈائون کامیابی سے جاری ہے۔

اس حوالے سے سی ٹی او لاہور عمارہ اطہر کا کہنا ہے کہ شہری ای چالان سے بچنے کےلئے نمبر پلیٹس سے چھیڑ چھاڑ اور نمبر پلیٹس غیر واضح جگہ پر لگاتے ہیں ،اسی طرح شہریوں کی بڑی تعداد نمبر پلیٹس پر سیاہ پیپر لگا لیتی ہے، نمبر پلیٹس پر ٹیمپرنگ، جعلی اور واضح نمبر نہ ہونے پر کوئی عذر قبول نہیں ہوگا ، موٹرسائیکل اور گاڑی پر فینسی نمبر پلیٹس لگانے کی بھی ہرگز اجازت نہیں ہوگی۔

(جاری ہے)

سی ٹی اونے بتایا کہ بوگس نمبر پلیٹس اور نمبر پلیٹس پر ٹیمپرنگ کرنے والوں کےخلاف مقدمات درج ہوں گے۔ انہوں نے کہا کہ قانون شکن اور جرائم پیشہ افراد اپنی شناخت چھپانے کےلئے جعلی اور اپلائیڈ فار گاڑیوں کا استعمال کرتے ہیں، ان کے خلاف مقدمات موٹروہیکل آرڈیننس 97 اے کے تحت درج ہوں گے، شہر کی مصروف اور اہم شاہراہوں پر خصوصی ناکے لگا کر کارروائی عمل میں لائی جائے گی۔ عمارہ اطہر نے کہا کہ ایسی تمام وہیکلز جن پر نمبر پلیٹس ایکسائز کے نمونے کے مطابق لگی ہیں انہیں چالان نہیں کیا جائے گا، ایسے شہری جنہوں نے نمبر پلیٹس کے لئے اپلائی کیا ہوا ہے وہ ایکسائز سلیپ ساتھ رکھیں۔