امریکی شہری کو30 ڈالر کی لاٹری نے کروڑ پتی بنا دیا

پہلے سمجھا10 ہزار ڈالر کی لاٹری نکلی ہے، لاٹری دفتر پہنچنے پر معلوم ہوا لاٹری ایک لاکھ ڈالر کی ہے، انٹرویو

منگل 23 نومبر 2021 16:16

واشنگٹن(اُردو پوائنٹ اخبارتازہ ترین - این این آئی۔ 23 نومبر2021ء) امریکہ میں 30 ڈالر کی لاٹری خرید کر قسمت آزمائی کرنے والا شخص کروڑ پتی بن گیا۔غیر ملکی میڈیا کے مطابق امریکہ کی ریاست میری لینڈ کے رہائشی نے پہلی مرتبہ اسکریچ کرنے والی لاٹری خریدی جس نے اس کی زندگی ہی بدل ڈالی اور وہ لاکھوں ڈالر کا مالک بن گیا۔28 سالہ امریکی شہری نے لاٹری جیتنے کے بعد ایک انٹرویو میں کہا کہ میں نے متعدد لاٹریاں خریدیں اور چھوٹے چھوٹے انعام حاصل کیے اور پھر مجھے خیال آیا کہ کیوں نہ ان سب جیتی ہوئی رقم سے ایک بڑی لاٹری خریدی جائے۔

(جاری ہے)

انہوں نے کہا کہ میں نے انعامی رقم سے ہی دوبارہ لاٹریاں خرید لیں لیکن ان میں موجود 30 ڈالر کی لاٹری پر قسمت نہیں آزمائی تاہم مجھے اچانک خیال آیا کہ 30 ڈالر والی لاٹری پر قسمت نہیں آزمائی تو گھر جانے سے قبل کار میں بیٹھ کر لاٹری سکریچ کی تو انعام نکل آیا۔امریکی شہری نے کہا کہ میں سمجھا کہ شائد 10 ہزار ڈالر کی لاٹری نکلی ہے تاہم جب میں لاٹری کمپنی کے دفتر پہنچا تو ایک بار پھر اپنی جیتی ہوئی انعامی رقم پر نظر ڈالی تو مجھے یقین ہی نہیں آیا کہ میری انعامی رقم 10 ہزار ڈالر نہیں بلکہ ایک لاکھ ڈالر ہے۔