خیبرپختونخوا میں چھ نئے آئی ٹی پارکس کے قیام کا منصوبہ

جمعرات 14 نومبر 2019 23:24

پشاور(اُردو پوائنٹ اخبارتازہ ترین - آن لائن۔ 14 نومبر2019ء) خیبرپختونخوا انفارمیشن ٹیکنالوجی بورڈ کے زیرانتظام صوبے میں قائم آئی ٹی پارکس کو وسعت دینے کے حوالے سے گزشتہ روز ایک اعلیٰ سطح اجلاس کا اہتمام کیا گیا۔خیبرپختونخوا آئی بورڈ کے ڈائریکٹر عاصم جمشید کی زیرصدارت اس اجلاس میں آئی بورڈ کے ڈائریکٹر ایڈمن عمران خان اور ڈپٹی ڈائریکٹر اپریشن بلال محمد کے علاوہ صوبہ بھر سے سرکاری اور پرائیویٹ جامعات کے فوکل پرسنز نے شرکت کی۔

اجلاس میں صوبے میں مزید چھ آئی ٹی پارکس کے قیام کے حوالے سے مشاورت کی گئی۔ جامعات کے نمائندگان نے نئے آئی ٹی پارکس کے ماڈل کو مزید بہتر کرنے کے لئے تجاویز پیش کئے۔اجلاس میں آئی ٹی بورڈ کے ڈائریکٹرایڈمن عمران خان نے شرکاء کو آئی ٹی پارکس کے نئے ماڈل کے حوالے سے بریفنگ دی۔

(جاری ہے)

آن کیمپس ماڈل کے مطابق نئے آئی ٹی پارکس یونیورسٹیوں کے اندر قائم کئے جائینگے جس سے آئی ٹی کے شعبے کو فروع ، اس سیکٹر میں نئے تحقیق کے مواقع اورنوجوانوں کے لئے روزگار کے مواقع میئسر ہونگے ۔

اس موقع پر خیبرپختونخوا انفارمیشن ٹیکنالوجی بورڈ کے ڈائریکٹر عاصم جمشید کا کہنا تھا کہ آئی بورڈ کے بنانے گئے اس نئے آن کیمپس ماڈل کی بدولت جامعات اور آئی ٹی انڈسٹری کے مابین فاصلوں میں کمی واقع ہوگی۔ان کا مزید کہنا تھا کہ خیبرپختونخوا انفارمیشن ٹیکنالوجی بورڈ کی کوشش ہے کہ صوبے میں آئی ٹی پارکس کو وسعت دی جائے اور آئی ٹی پارکس کی بدولت انفارمیشن اینڈ کمیونیکیشن ٹیکنالوجی سے منسلک کاروبار کوصوبے میں مزید مستحکم کیا جائے۔