وزیر اعلیٰ خیبر پختونخوا کی زیر صدارت کوہاٹ ڈویژن ڈیویلپمنٹ پروگرام سے متعلق اہم اجلاس

پشاور(اُردو پوائنٹ اخبارتازہ ترین - این این آئی۔ 20 مئی2024ء) وزیر اعلیٰ خیبر پختونخوا سردار علی امین خان گنڈاپور کی زیر صدارت کوہاٹ ڈویژن ڈیویلپمنٹ پروگرام سے متعلق ایک اہم اجلاس وزیر اعلیٰ ہاؤس پشاور میں منعقد ہوا جس میں وزیر اعلیٰ نے آئل اینڈ گیس کی رائلٹی کی مد میں کوہاٹ ڈویژن کیلئے مختص ترقیاتی فنڈ 10 فیصد سے بڑھا کر 15 فیصد کرنے کا اصولی فیصلہ کرتے ہوئے متعلقہ حکام کو اس کی حتمی منظوری کیلئے کیس صوبائی کابینہ کو پیش کرنے کی ہدایت کی ہے۔

صوبائی وزیر زراعت میجر ریٹائرڈ سجاد باریکول اور ایڈیشنل چیف سیکرٹری امتیاز حسین شاہ کے علاوہ متعلقہ انتظامی سیکرٹریوں، کمشنر کوہاٹ اور متعلقہ ڈپٹی کمشنرز نے اجلاس میں شرکت کی۔اجلاس میں وزیر اعلیٰ کو کوہاٹ ڈویژن ڈیویلپمنٹ پروگرام کے تحت ترقیاتی منصوبوں سے متعلق مختلف امور پر بریفنگ دی گئی۔

(جاری ہے)

وزیر اعلیٰ نے کوہاٹ ڈویژن ڈیویلپمنٹ پروگرام کے تحت تینوں اضلاع میں ترقیاتی کاموں کا سالانہ ورکنگ پلان جلد تیار کرنے کی ہدایت کی اور واضح کیا کہ اس بات کو ہر لحاظ سے یقینی بنایا جائے کہ تیل اور گیس کی رائلٹی کی مد میں پیداواری اضلاع کیلئے مختص رقم انہی اضلاع پر خرچ ہوئی ہے۔

انہوں نے مزید ہدایت کی کہ کوہاٹ ڈویژن ڈیویلپمنٹ پروگرام پر عملدرآمد کیلئے قائم کمیٹیوں کو فعال بنانے کیلئے ضروری اقدامات اٹھائے جائیں۔ انہوں نے کوہاٹ ڈویژن ڈیویلپمنٹ پروگرام کے تحت مقامی نوجوانوں کو تکنیکی ہنر سکھانے پر خاص توجہ دینے جبکہ کوہاٹ ڈویژن سے نکلنے والے تیل و گیس کی صحیح مقدار کا تعین کرنے کیلئے میکنزم تیار کرنے کی بھی ہدایت کی ہے۔