پشاور، صوبائی وزیر اطلاعات کوہاٹ میں غیر اعلانیہ لوڈشیڈنگ پر برہم،واپڈا کو فوری اقدامات کا حکم

پشاور (اُردو پوائنٹ اخبارتازہ ترین - اے پی پی۔ 02 جولائی2026ء) خیبرپختونخوا کے وزیر اطلاعات و تعلقاتِ عامہ شفیع جان نے کوہاٹ میں جاری غیر اعلانیہ اور طویل دورانیے کی لوڈشیڈنگ پر سخت تشویش کا اظہار کرتے ہوئے واپڈا حکام کو غیر ضروری بجلی بندش فوری ختم کرنے اور بجلی کی بلا تعطل فراہمی یقینی بنانے کی ہدایت کی ہے۔محکمہ اطلاعات خیبرپختونخوا تر جمان کے مطابق یہ ہدایات انہوں نے جمعرات کو ڈپٹی کمشنر آفس کوہاٹ میں منعقدہ اعلیٰ سطحی اجلاس کی صدارت کرتے ہوئے جاری کیں۔

اجلاس میں ڈپٹی کمشنر کوہاٹ محمد نواز وزیر، اسسٹنٹ کمشنر نوید احمد، سابق تحصیل میئر گمبٹ ساجد اقبال، رکن قومی اسمبلی شہریار خان آفریدی کے فوکل پرسن قاسم زبیر، مقامی مشران اور واپڈا کے متعلقہ افسران نے شرکت کی۔

(جاری ہے)

اجلاس میں غیر اعلانیہ لوڈشیڈنگ، بجلی کی فراہمی میں تعطل اور اس کے باعث شہریوں، کاروباری سرگرمیوں اور عوامی خدمات پر پڑنے والے اثرات کا تفصیلی جائزہ لیا گیا۔

شرکاء نے کہا کہ طویل لوڈشیڈنگ سے عوام کو شدید مشکلات کا سامنا ہے اور معمولاتِ زندگی بری طرح متاثر ہو رہے ہیں۔ شفیع جان نے کہا کہ عوام کو بنیادی سہولیات کی فراہمی صوبائی حکومت کی اولین ترجیح ہے اور غیر ضروری لوڈشیڈنگ کسی صورت قابل قبول نہیں۔ انہوں نے واپڈا حکام کو بجلی کے ترسیلی نظام میں فوری بہتری، تکنیکی خرابیوں کے بروقت ازالے اور عوامی شکایات کے فوری حل کو یقینی بنانے کی ہدایت کی۔ اجلاس میں واپڈا حکام نے بجلی کی فراہمی، لوڈ مینجمنٹ اور نظام کی بہتری کیلئے جاری اقدامات پر بریفنگ دی جبکہ وزیر اطلاعات نے واضح کیا کہ عوام کو فوری ریلیف کی فراہمی کیلئے عملی اور نتیجہ خیز اقدامات جلد سامنے آنے چاہئیں۔