کیسکو کی نادہندگان اور بجلی چوروں کے خلاف صوبہ بھرمیں کارروائیاں جاری

کوئٹہ (اُردو پوائنٹ اخبارتازہ ترین - اے پی پی۔ 22 مئی2024ء) کوئٹہ الیکٹک سپلائی کمپنی (کیسکو )کی بجلی چوروں اورنادہندگان کے خلاف صوبے بھر میں کارروائیاں جاری ہیں ۔ترجمان کیسکو کے مطابق ا س سلسلے میں کیسکونے بجلی چوروں کے خلاف کارروائی کرتے ہوئے بجلی میٹروں کو شٹ اورمیٹر ریڈنگ سلو کرنے والے 24ہزار922گھریلوکنکشنز،8ہزار404کمرشل کنکشن جبکہ 2ہزار508زرعی کنکشنزاور537صنعتی کنکشنز منقطع کرکے بعد ازاں اُن پر جرمانے عائد کردئیے اوراس طرح مجموعی طورپراُنہیں ایک کروڑ 25 لاکھ 84 ہزاربجلی یونٹ ڈیٹیکشن کی مد میں چارج کیئے گئے جبکہ چارج شدہ بجلی یونٹس کی قیمت تقریباً64کروڑ99لاکھ 75ہزارروپے بنتی ہے جن میں سے کیسکونے اب تک60کروڑ62 لاکھ 26ہزارروپے سے زائد رقم وصول بھی کرلی ہے۔

اس کے علاوہ خصوصی مہم کے دوران کیسکوٹیموں کی جانب سے بجلی چوروں کے خلاف قانونی کارروائی کے لئے صوبہ کے مختلف پولیس سٹیشنوں میں 6ہزار398 تحریری درخواستیں ارسال کر دی گئیں ہیں جن میں سے اب تک 607 بجلی چوروں کے خلاف ایف آئی آرز بھی درج کی جا چکی ہیں۔

(جاری ہے)

علاوہ ازیں روزانہ کی بنیاد پر نادہندگان سے بجلی بلوں کی مدمیں بقایاجات کی وصولی کاعمل بھی تیزی سے جاری ہے اوراس سلسلے میں کیسکوٹیموں نے ماہ ستمبر سے اب تک صوبائی دارالحکومت کوئٹہ سمیت پشین، لورلائی،سبی،خضداراور مکران آپریشن سرکلز میں بقایاجات کے حامل 2 لاکھ49ہزار202 نادہندہ صارفین سے تقریباً3 ارب71کروڑ89لاکھ 30ہزارروپے سے زائد رقم وصول کرلی ہے۔

واضح رہے کہ صوبہ بھرکے تمام آپریشن سرکلز میں کیسکوکی ٹیمیں تمام بجلی چوروں اور نادہندگان کے خلاف بلاامتیاز کارروائیاں کررہی ہیں اوراس سلسلے میں صارفین سے اپیل کی جاتی ہے کہ وہ اپنے بجلی بلوں کی ادائیگی کے ساتھ ساتھ اپنے ذمہ بقایاجات بھی اداکریں بصورت دیگر کیسکوکسی بھی نادہندہ صارف کے کنکشن منقطع ہونے یا مزید کسی بھی زحمت اور پریشانی کی ذمہ دار نہیں ہوگی۔