انسانیت کی معراج انسانیت کی خدمت میں ہے، فلاحی کاموں سے انسانیت کی جو خدمت کی جا سکتی ہےاس کا کوئی متبادل نہیں، کمشنر راولپنڈی ڈویژن انجینئر عامر خٹک

ہفتہ 18 مئی 2024 23:08

راولپنڈی (اُردو پوائنٹ اخبارتازہ ترین - اے پی پی۔ 18 مئی2024ء) کمشنر راولپنڈی ڈویژن انجینئر عامر خٹک نے کہا ہے کہ انسانیت کی معراج انسانیت کی خدمت میں ہے، فلاحی کاموں سے انسانیت کی جو خدمت کی جا سکتی ہے، اس کا کوئی متبادل نہیں ، پاکستان سویٹ ہوم آ کر دلی خوشی محسوس ہوئی، ان خیالات کا اظہار انہوں نے پاکستان سویٹ ہوم میں منعقدہ تقریب سے خطاب کرتے ہوئے کیا، سربراہ پاکستان سویٹ ہوم زمرد خان نے کمشنر راولپنڈی کو پاکستان سویٹ ہوم میں بچوں کی تعلیم و تربیت اور دیگر معاملات سے آگاہ کیا، تقریب سے خطاب کرتے ہوئے کمشنر راولپنڈی ڈویژن نے کہا کہ وہ خود کو بحیثیت رضا کار پاکستان سویٹ ہوم کے لیے اپنی خدمات پیش کرتے ہیں ، زمرد خان اور ان کی ٹیم کو خراج تحسین پیش کرتا ہوں جنہوں نے اس عظیم کام کے لیے خود کو پیش کیا، ملک بھر سے بچے بچیاں پاکستان سویٹ ہوم کا حصہ ہیں جنہیں بہترین تعلیم و تربیت فراہم کی جا رہی ہے، تقریب سے خطاب کرتے ہوئے سربراہ پاکستان سویٹ ہوم زمرد خان نے کہا کہ ملک کے مختلف شہروں میں پاکستان سویٹ ہوم کے ادارے کام کر رہے ہیں، پاکستان سویٹ ہوم سے وابستہ فرشتے اور پریاں اعلیٰ تعلیم حاصل کر رہی ہیں، تقریب کے بعد کمشنر راولپنڈی نے بچوں کے ساتھ کرکٹ بھی کھیلی۔