کیٹی بندر ،3 کشتیاں الٹنے سے ڈوبنے والے 3 ماہی گیروں کی لاشیں مل گئیں

اتوار 23 جنوری 2022 15:00

ٹھٹھہ (اُردو پوائنٹ اخبارتازہ ترین - این این آئی۔ 23 جنوری2022ء) ضلع ٹھٹھہ میں کیٹی بندر کے قریب گہرے سمندر میں 3 کشتیاں الٹنے کے واقعے میں لاپتہ ہونے والے مزید 2 ماہی گیروں کی لاشیں مل گئی ہیں۔

(جاری ہے)

پاک نیوی کے ہیلی کاپٹروں اور ہیوی بوٹس کے ذریعے 9 ماہی گیروں کی تلاش کے لیے سرچ اینڈ ریسکیو آپریشن کیا گیا،پاکستان فشر فوک فورم کے مطابق گزشتہ روز تیز طوفانی ہوائوں کے باعث حجامڑو کریک اور کائر کریک کے مقام پر 3 کشتیاں اٴْلٹ گئی تھیں جس کے نتیجے میں 46 ماہی گیر لاپتہ ہو گئے تھے،اب تک 3 ماہی گیروں کی لاشیں نکال لی گئی ہیں، جبکہ 34 کو بچا لیا گیا ہے،9 ماہی گیروں کی تلاش کے لیے نیوی کی ریسکیو ٹیموں اور 2 ہیلی کاپٹرز کا آپریشن جاری رہا۔

پاکستان نیوی کے جوانوں کے کھلے سمندر میں سرچ اینڈ ریسکیو آپریشن میں 2 ہیلی کاپٹرز، 4 ہیوی بوٹس، 2 شپس، 200 پاک نیوی کے جوان اور غوطہ خور شامل ہیں۔واقعہ کے بعد کمشنر حیدر آباد نے ٹھٹھہ، سجاول اور بدین کے اضلاع میں سمندر میں شکار کرنے اور نہانے پر پابندی عائد کر دی ہے، یہ پابندی ایک ہفتے کے لیے دفعہ 144 کے تحت نافذ کی گئی ہے۔