Rafi Khawar Nanha

وقار اشرف
معروف اداکار رفیع خاور ننھا کو بچھڑے 39 برس بیت گئے، فلموں کے ساتھ ساتھ ان کی مزاحیہ اداکاری نے ٹی وی ڈرامہ ”الف نون“ کی کامیابی میں بھی اہم کردار ادا کیا، وہ صرف مزاحیہ اداکار نہیں تھے بلکہ المیہ کرداروں کو بھی بہت خوبی سے نبھاتے تھے۔ننھا نے اپنے عروج کے دور میں 2 جون 1986ء کو خودکشی کر لی تھی۔
1942ء کو حجرہ شاہ مقیم میں پیدا ہونے والے رفیع خاور نے کیریئر کا آغاز تھیٹر سے کیا، 1964ء میں ریڈیو پاکستان کے پروگرام میں صداکاری کی، 1966ء میں فلم ”وطن کا سپاہی“ سے فلمی کیریئر کا آغاز کیا لیکن شہرت 1975ء میں فلم ”نوکر“ سے ملی جس کے بعد فلم ”ٹہکا پہلوان“ ان کی بطور ہیرو پہلی فلم تھی۔

(جاری ہے)

”دبئی چلو“ میں بھی ان کی اداکاری مثالی تھی جبکہ ان کی فلم ”سالا صاحب“ نے لاہور میں مسلسل 300 ہفتے تک زیرِ نمائش رہ کر نیا ریکارڈ قائم کیا تھا۔

ان کی اداکار علی اعجاز اور منور ظریف کے ساتھ جوڑی کو بہت پسند کیا گیا تھا۔انہوں نے اپنے دور کی تمام اداکاراؤں کے ساتھ کام کیا جن میں ممتاز، انجمن، مسرت شاہین، رانی اور دردانہ رحمان شامل ہیں لیکن نازلی کے ساتھ ان کی جوڑی کو زیادہ پسند کیا گیا تھا۔
ننھا نے 20 سالہ فلمی کیریئر کے دوران 391 فلموں میں کام کیا جن میں 166 فلمیں اردو، 221 پنجابی، 3 پشتو اور 1 سندھی تھی۔ان کی آخری فلموں میں ”پسوڑی بادشاہ“ اور ”ہم سے نہ ٹکرانا“ شامل تھیں جبکہ ان کی یادگار فلموں میں سوہرا تے جوائی‘ دبئی چلو‘ سالا صاحب‘ پلے بوائے‘ سونا چاندی‘ لو سٹوری‘ دوستانہ‘ چوڑیاں‘ پردے میں رہنے دو‘ آس‘ نوکر‘ آخری جنگ‘ نوکر تے مالک‘ سودے دلاں دے‘ قدرت‘ مرزا مجنوں رانجھا‘ صاحب جی‘ مہندی اور تیری میری اک مرضی شامل ہیں۔