Dhanak Rang Pehnawe - Article No. 3166

راحیلہ مغل
ہمارے ملک میں عام طور پر مون سون کا آغاز جون،جولائی سے ہو جاتا ہے،مگر امسال موسمیاتی تبدیلیوں کے سبب جون کے آخری عشرے سے پری مون سون کا آغاز کچھ یوں ہوا ہے کہ کئی شہروں میں تیز آندھی،گرج چمک کے ساتھ موسلا دھار بارشوں کا سلسلہ جاری ہے،لیکن اِدھر بارش کا زور ٹوٹتا ہے،اُدھر گرمی کی حدت و شدت اپنے رنگ ڈھنگ دکھانے شروع کر دیتی ہے۔بہرحال،موسم چاہے جیسا ہو،ہماری خواتین کی تو یہی کوشش ہوتی ہے کہ اپنی شخصیت حسین و دلکش پہناوؤں سے مرصع رکھیں،اس لئے اس موسم میں زیادہ تر خواتین شوخ رنگوں کے سوتی ملبوسات پسند کرتی ہیں۔دراصل برسات کی آمد کے ساتھ ہی خواتین کے چہرے کھل اُٹھتے ہیں،یہ موسم خواتین کے چہروں اور ملبوسات پر بہار کے رنگ بکھیر دیتا ہے۔

(جاری ہے)

ویسے تو خواتین کے لئے فیشن،میک اپ اور کپڑوں کے انتخاب کے حوالے سے کوئی بھی خاص موسم نہیں ہے۔

لیکن فیشن اس موسم میں دب جاتا ہے،میک اپ میں سادگی کی احتیاط کرنا پڑتی ہے،کیونکہ نمی اور پسینہ چہرے کے میک اپ کو متاثر کرتا ہے اور نقوش بگاڑتا ہے۔اس موسم میں لان اور ہلکے سوتی کپڑے جن کے رنگ دھیمے اور ڈیزائن سادہ ہوں اور سرمئی ماحول میں آنکھوں کو بھلے لگیں،زیب تن کرنے چاہئیں۔سمجھ دار لڑکیاں برسات کے موسم میں اپنے پہناوے پر خاص دھیان دیتی ہیں۔
وہ مارکیٹ سے اچھی ساکھ رکھنے والی ملوں کا تیار کردہ کپڑا خریدتی ہیں اور نگاہوں کو بھانے والے ڈیزائن کی پوشاک بنواتی ہیں۔وہ سفید ریشمی دوپٹے خریدتی ہیں اور انہیں کپڑوں کی مناسبت سے دیدہ زیب رنگوں میں رنگواتی ہیں یوں وہ ان تتلیوں کو شرماتی ہیں،جو برسات کے موسم میں اپنے جھلملاتے رنگوں کے ساتھ نمودار ہوتی ہیں۔برسات کے موسم کے پہناوے سال کے باقی موسموں کے مقابلے میں منفرد اور توجہ طلب ہوتے ہیں،گھر گھر انٹرنیٹ کی موجودگی نے ملک کی صنف نازک کو دیگر معلومات کے ساتھ ساتھ اس امر سے بالخصوص باخبر کر رکھا ہے کہ کس موقعہ پر کیا پہننا ہے،انہیں سب معلوم ہے کہ موسم گرما کے پہناوے کون سے ہیں۔ساون رُت میں خواتین کے آنچل ماحول سے نہ صرف مطابقت رکھتے ہیں،بلکہ موسم کے سرمئی پن میں زندگی پیدا کرتے ہیں۔
اکثر دیکھا گیا ہے کہ لڑکیاں بالیاں اسکن فٹڈ جینز کے ساتھ آسمانی بیس میں پرنٹڈ گول دامن قمیض کے ساتھ بہت پیاری لگتی ہیں،اور لباس سے ہم آہنگ پرنٹڈ دوپٹہ بھی اُن پر خوب جچتا ہے،ساتھ ہی ساتھ اگر سیاہ رنگ گلاسز بھی ہوں تو خوب بات بنتی ہے۔پھر فون رنگ کے پلین ڈھاکا فلیپر کے ساتھ فون رنگ کی قمیض بھی بہت بھلی لگتی ہے،جس کے گلے پر ستارہ ورک ہو تو ساتھ چیتا پرنٹ سے آراستہ کوٹی کے بھی کیا ہی کہنے۔اسی طرح نارنجی رنگ پیراہن کا انداز بھی اسٹائلش ہے کہ پرنٹڈ چوڑی دار پاجامے کے ساتھ کلیوں والی قمیض،جس کے گلے،آستینوں اور دامن پر دھاگے اور ستاروں کا کام خوشگوار تاثر دے،تو ساتھ براؤن رنگ گلاسز کا بھی جلوہ خوب بھلا لگتا ہے۔جب کہ سُرخ رنگ پلین فلیپر کے ساتھ سیاہ رنگ میں پرنٹڈ قدرے لمبی اے لائن فراک کے اسٹائلش لُک کا بھی خواب نہیں،اسی طرح پیرٹ گرین رنگ فلیپر کے ساتھ پرنٹڈ قمیض بھی خوش نما لگتی ہے۔نیز،دو رنگی دوپٹے اور اسٹائلش گلاسز کا انداز بھی لاجواب ہوتا ہے۔دراصل کھلتے ہوئے ہلکے رنگوں میں لون،سوتی کپڑوں،شفون یا خالص ریشم کے لہراتے دوپٹے پہننے والوں کے ذوق کو اجاگر کرتے ہیں۔مون سون،ساون بھادوں یا برسات کا موسم ایک ہی کیفیت کے مختلف نام ہیں۔یہ کیفیت گرمی سے جھلسے ہوئے جسموں کو سکون دیتی اور روح کی بے چینی کو اطمینان بخشنی ہے۔مون سون گرمیوں کے ایک سخت موسم کے بعد اپنی آمد سے ماحول کے تناؤ کو کم کرتا ہے۔
ایک کڑکتی دوپہر میں جب ہو ایک لخت چلنا شروع ہو جائے،ہلکے سرمئی بادل گہرے سیاہ بادلوں میں تبدیل ہو جائیں۔آسمان پر بادلوں کے دل کے دل حرکت کرنے اور ان کی کڑکڑاہٹ سنائی دینے لگے تو وہ دل جو گرمی کی شدت سے ادھ موئے ہوئے ہوتے ہیں،یک لخت کھل اُٹھتے ہیں۔بلاشبہ رب العزت کی یہ ایک بے پایاں رحمت ہے،جس کا شکر ہر حال میں واجب ہے،لیکن اس موسم میں نمی کا تناسب ہوا میں چونکہ زیادہ ہوتا ہے اس لئے ایک عجیب طرح کی چپ چپاہٹ بدن کا جزو بن جاتی ہے،جس سے چہرے کا میک اپ بگڑتا ہے اور کپڑے جسم سے چپکنے لگتے ہیں،جو بھاری پن کا ایک علیحدہ احساس دلاتے ہیں۔اب ہر جگہ تو ایئر کنڈیشنر کی سہولت موجود نہیں ہوتی،لہٰذا ملبوسات ایسے ہونے چاہیں جو سوہان روح نہ بنیں اور روزمرہ کے کام کاج میں زحمت پیدا نہ کریں۔ہمارے ملک میں بدقسمتی سے آلودگی اور کثافت نے موسموں پر گہرا اثر ڈالا ہے۔
برسات کے وہ دن عنقا ہو چکے ہیں جب آسمان سیاہ گھٹاؤں سے ڈھکا رہتا تھا۔ہفتہ بھر موسلا دھار بارش برستی تھی،فضا میں خنکی کا احساس رچا ہوتا تھا اس موسم میں شہروں کے لوگ پہاڑی علاقوں کا رخ نہیں کرتے تھے کیونکہ شہروں میں موسم زیادہ بخش ہوتا تھا،گھروں میں پکوان پکتے تھے اور تقریبات میں ہر اس رنگ کے پہناوے پہنے جاتے تھے،جو رنگ موسم برسات کے رنگ سے میل کھاتے تھے۔
اب برسات کا موسم بارشیں اور ٹھنڈی ہوائیں کم اور مرطوبیت،حبس،نمی اور چپ چپاہٹ زیادہ لاتا ہے۔تاہم اب لڑکیاں بالیاں سمجھ دار اور ہوش مند ہیں جو اپنا اور اپنے ملبوسات کا خاص خیال رکھتی ہیں۔وہ جانتی ہیں کہ اس موسم میں دوپٹے کے رنگ سب سے زیادہ اہمیت رکھتے ہیں کیونکہ یہ بدن پر اوڑھا جاتا ہے اور فوری توجہ کا مرکز بنتا ہے۔لمبی قمیضوں اور کرتوں کے ساتھ اپنے لباس کو وہ ایسی جدت دے رہی ہیں جو ان کے وقار میں اضافے کا باعث بنتا ہے اور ان کی شخصیت کو ایسی تازگی بخشتا ہے،جو برسات میں دھلنے کے بعد ہریالی کی رونق بنتی ہے۔برسات کے موسم میں چونکہ پسینہ بھی بہت زیادہ آتا ہے اس لئے کوشش کریں کہ زیادہ ہیوی میک اپ نہ کریں۔صرف ہلکا فاؤنڈیشن استعمال کریں۔اور میک اپ کرتے وقت اس بات کی تسلی کر لیں کہ آپ کے میک اپ پراڈکٹس آئل فری ہوں۔
گرمی اور نمی والا یہ موسم میک اپ کے لئے مناسب نہیں۔اگر آپ میک اپ کرتے وقت ان تمام باتوں کا خیال رکھیں گی تو آپ کا چہرہ نکھرہ نکھرہ اور فریش لگے گا۔میک اپ کرتے وقت دھیان رکھیں کہ آپ کا فاؤنڈیشن اور آئی شیڈز اچھے معیار کے ہوں،کیونکہ گرمی کے موسم میں میک اپ کو زیادہ دیر تک قائم رکھنے کے لئے ان پراڈکٹس کا آئل فری ہونا ضروری ہے۔گرمی کے موسم میں کوشش کریں کہ واٹر پروف مسکارا کا انتخاب کریں،کیونکہ یہ گرمی اور پسینہ کے باعث پھیلتا نہیں ہے۔آئی شیڈ استعمال کرتے وقت اس بات کا دھیان رکھیں کہ آپ نے اس کو لگانے سے پہلے آئی شیڈ پرائمر لگایا ہے یا نہیں۔کوشش کریں کہ آئی شیڈ کو انگلی مدد سے لگائیں۔آئی لائنر کے طور پر آئی پنسل کا استعمال کریں۔اس سلسلے میں آپ بلیک آئی پنسل یا کسی بھی دوسرے کلر کی آئی پنسل استعمال کر سکتی ہیں،چونکہ گرمی کا موسم ہے اس لئے کوشش کریں کہ میک اپ کرنے کے بعد میک اپ سیٹنگ سپرے کا استعمال بھی کریں اس سے آپ کا میک اپ زیادہ دیر تک آپ کے چہرے پر برقرار رہے گا اور آپ کو ری ٹچ کرنے کی ضرورت محسوس نہیں ہو گی۔