Bachoon Ki Wo Madad Kijye Jiss Ki Unhain Zarorat Hai - Article No. 2557

کیا آپ نے اپنے بچے کے مزاج،رویے،وزن،صحت یا سونے جاگنے کے اوقات میں نمایاں طور پر کوئی تبدیلی محسوس کی ہے؟کیا کوئی مسئلہ اسے پریشان کر رہا ہے‘ہو سکتا ہے کہ یہ اسکول میں ساتھیوں کا ناروا رویہ ہو یا کوئی ناجائز دباؤ ہو،اپنی جسمانی شاخت کے بارے میں کوئی احساس کمتری ہو یا فیملی کی طرف سے نظر انداز کیا جانا ہو۔
والدین اکثر اس طرح کی علامات کی طرف توجہ دینے میں ناکام ہو جاتے ہیں کہ ہو سکتا ہے کہ ان کے بچے کو کسی نفسیاتی مدد کی ضرورت ہو موڈ میں مستقل اتار چڑھاؤ‘اچانک چڑچڑاہٹ عود کر آنا،غصے میں پھٹ پڑنا‘گھنٹوں اپنے کمرے میں بند رہنا اور وزن کا اچانک تیزی سے کم ہو جانا یا بڑھ جانا یہ اہم واضح علامات ہیں کہ آپ کے بچے کو مدد کی ضرورت ہے۔
ٹین ایجر بچے عام طور پر ڈپریشن کا آسان شکار بن سکتے ہیں۔

(جاری ہے)

اس عمر میں والدین اور بچوں کے درمیان کمیونیکیشن گیپ آجاتا ہے جسے ختم کرنا یا کم کرنا بے حد ضروری ہوتا ہے۔عام طور پر والدین یہ فرض کر لیتے ہیں کہ بچے اس صورتحال سے خود بخود باہر نکل آئیں گے یا پھر سوچتے ہیں کہ اگر ہم انہیں کسی سائیکاٹرسٹ کے پاس لے گئے تو لوگ کیا کہیں گے(برصغیر پاک وہند کے والدین کے سوچنے کا عمومی انداز) ہمارے معاشرے میں اکثر والدین یہ سمجھتے ہیں کہ وہ اپنے بچے کی ویکس نیشن کروا لیتے ہیں‘انہیں اچھے اور بہترین اسکول میں داخل کرتے ہیں اور ہر ماہ انہیں ایک ہینڈسم پاکٹ منی دینے کے بعد ان کے حصے کے تمام فرائض ادا ہو گئے ہیں اور بچوں کو صحتمند اور خوش رکھنے کے لئے یہ سب کافی ہے ‘لیکن یہ سب کچھ کافی نہیں ہے ان سب سے ہٹ کر بچوں کو والدین کے جذباتی سہارے اور اس یقین دہانی کی ضرورت ہوتی ہے کہ زندگی کی ہر مشکل گھڑی میں آپ ان کے ساتھ کھڑے ہوں گے‘اگر آپ اپنے بچے کے کسی بھی مسئلے کو لے کر خود کو لاچار و بے بس محسوس کرتے ہیں تو بچے کو کسی تھراپسٹ یا سائیکاٹرسٹ کے پاس لے جانے میں نہ گھبرائیں۔

زندگی کے مشکل دور سے نکلنے کے لئے بچے کو جذباتی سہارا دیجیے اور اسے ہر وہ مدد فراہم کیجیے جس کی اسے ضرورت ہے۔