ملک بھر میں بارشوں اور برفباری کے باعث سردی کی شدت میں اضافہ ،کئی علاقوں کا دیگر شہروں سے زمینی رابطہ منقطع ہو گیا

راولپنڈی (اُردو پوائنٹ اخبارتازہ ترین - این این آئی۔ 15 جنوری2017ء) ملک بھر میں بارشوں اور برفباری کے باعث سردی کی شدت میں اضافہ جبکہ کئی علاقوں کا زمینی رابطہ دیگر شہروں سے منقطع ہو گیا ، کوئٹہ کے کئی علاقوں میں سوئی گیس کے پریشر میں کمی اور بجلی کی عدم دستیابی نے شہریوں کی مشکلات میں اضافہ کردیا ہے ،بلوچستان میں ہائی الرٹ جاری کر دیا گیا ہے۔

تفصیلات کے مطابق اسلام آباد اور پنجاب کے میدانی علاقوں میں بارشوں کے باعث سردی کی شدت برقرار ہے جبکہ ملک کے بالائی اور شمالی علاقوں میں پہاڑوں پر برفباری کا سلسلہ بھی جاری ہے۔ پاراچنارمیں میدانی علاقوں اور پہاڑوں نے برف کی چادر اوڑھ لی ہے،چترال اور غذر میں شدید برفباری کے باعث دونوں شہروں کا زمینی راستہ آپس میں منقطع ہو گیا ہے جبکہ سوات اور دیر میں بھی شدید برفباری کا سلسلہ جاری ہے۔

(جاری ہے)

گلگت بلتستان کی وادی ہنزہ شدید سردی کے لپیٹ میں آگئی ہے جس کے باعث بہتے ندی نالے اور آبشاریں جم کر برف بن گئی ہیں، اس کے علاوہ ملکہ کوہسار مری اور ایبٹ آباد میں بھی برفباری کا سلسلہ وقفے وقفے سے جاری ہے۔خشک سالی کے خطرے سے دوچار بلوچستان میں گزشتہ روز شرو ع ہونیوالی برفباری کا سلسلہ جاری ہے، کوئٹہ سمیت سرخاب، بوستان، قلات، زیارت، مستونگ، لورالائی میں بارش اور برفباری کا سلسلہ جاری سے جس سے سردی کی شدت میں اضافہ ہو گیا ہے جبکہ زیارت اور قلات کا زمینی رابطہ آپس میں منقطع ہو گیا ہے۔

مستونگ میں بھی لکپاس ٹنل برفباری کے باعث بند ہونے سے کوئٹہ سے کراچی اور تفتان جانے والی شاہراہ ٹریفک کے لئے بند ہے۔کسی بھی قسم کی ہنگامی صورت حال سے نمٹنے کیلئے صوبے بھر میں ہائی الرٹ کر کے متعلقہ اداروں کے اہلکاروں کی چھٹیاں منسوخ کر دی گئی ہیں اور محکمہ داخلہ میں کنٹرول روم قائم کر دیا گیا ہے۔کوئٹہ میں برفباری کے بعد فنی خرابی کے سبب بجلی کی فراہمی معطل ہے جبکہ گیس پریشر میں کمی نے لوگوں کی مشکلات میں اضافہ کردیا ہے۔ محکمہ موسمیات نے آئندہ 24 گھنٹوں کے دوران بلوچستان میں اکثر مقامات پر گرج چمک کے ساتھ بارش اور پہاڑوں پر برفباری کی پیش گوئی کی ہے۔