تعلیمی اداروں میں تعطیلات کی توسیع کا فیصلہ سیکیورٹی انتظامات کے پیش نظر کیا گیا ، مشتاق احمد غنی،

سکولز، کالجز اور یونیورسٹیوں کو متعلقہ ضلعی انتظامیہ سے این او سی جاری کئے جانے کے بعد کھولا جائیگا،صوبائی وزیراطلاعات

پیر 29 دسمبر 2014 21:17

پشاور(اُردو پوائنٹ اخبار تازہ ترین۔29دسمبر 2014ء)خیبر پختونخوا کے وزیر اطلاعات و تعلقات عامہ اور اعلیٰ تعلیم مشتاق احمدغنی نے کہاہے کہ سیکیورٹی انتظامات کے پیش نظر تمام تعلیمی اداروں کی تعطیلات میں توسیع کا فیصلہ کیا گیاہے ۔ صوبہ کے اب تمام سرکاری سکولز، کالجز اور یونیورسٹیاں 12 جنوری تک بند رہیں گی۔ پیر کے روز تعلیمی اداروں کے سربراہان پر مشتمل اعلیٰ سطح اجلاس کے بعد وزیر اطلاعات کا کہنا تھا کہ سانحہ پشاور کے تناظر میں صوبہ کے تمام تعلیمی اداروں کی سیکیورٹی کے لئے جامع اور مربوط پلان تشکیل دیا جا رہا ہے تاکہ کسی بھی نا خوشگوار واقعہ کو رونما ہونے سے روکا جا سکے، اس حوالے سے یہاں منعقدہ اعلٰی سطح اجلاس میں تعلیمی اداروں کے سربراہان کی مشاورت سے موسم سرما کی تعطیلات میں توسیع کا فیصلہ کیا گیا ہے۔

(جاری ہے)

انہوں نے کہا کہ تمام تعلیمی اداروں کو مقرر کردہ تاریخ تک اپنے اداروں میں سیکیورٹی کے انتظامات مکمل کرنے کی ہدایت کی گئی ہے جس کے بعد تمام سکولز،کالجوں، یونیورسٹیوں کو متعلقہ ضلعی انتظامیہ سے این او سی کے حصول کے بعد کھولا جائے گا۔ مشتاق احمد غنی کا کہنا تھا کہ آرمی پبلک سکول کے دلخراش سانحہ کے بعد تمام تعلیمی اداروں کی سیکیورٹی سخت کرنے کا فیصلہ کیا گیا ہے اور اس ضمن میں صوبائی حکومت ہر ممکن اقدامات اٹھا رہی ہے۔

موجودہ حکومت عوام کے جان و مال کا تحفظ یقینی بنانے اور امن و امان کے قیام کے لئے پر عزم ہے اور اس مقصد کے حصول کے لئے ہنگامی بنیادوں پر کام کئے جا رہے ہیں۔ انہوں نے مزید کہا کہ بچے ہمارا مستقبل ہیں جن کو بہتر ین تعلیم و تربیت کے لئے سازگار ماحول بناناہماری ذمہ داریوں میں شامل ہے۔ آرمی پبلک سکول کے واقعہ کے بعد بچوں کی نفسیاتی تربیت کے لئے ملک بھر سے ماہرین نفسیات کی خدمات حاصل کی جا رہی ہیں تاکہ بچوں کو اس صدمہ سے باہر نکالا جا سکے۔

Facebook Twitter Google + Share on Whatsapp

تعلیمی اداروں میں تعطیلات کی توسیع کا فیصلہ سیکیورٹی انتظامات کے پیش نظر کیا گیا ، مشتاق احمد غنی،

سکولز، کالجز اور یونیورسٹیوں کو متعلقہ ضلعی انتظامیہ سے این او سی جاری کئے جانے کے بعد کھولا جائیگا،صوبائی وزیراطلاعات

مزید تعلیم کی خبریں