پاکستان میں سراجیکل سٹرائیک سے امریکی حکومت پہلے سے آگاہ تھی ،بھارتی میڈیا کا دعویٰ

امریکی حکومت نے پاکستانی حکومت کو اشارہ دے دیا تھا کہ دہشت گردی کے خلاف جنگ میں امریکہ بھارت کے ساتھ کھڑا ہے،مو جودہ صورتحال میں پاک بھارت جنگ کے کوئی آثار نہیں ہیں کیونکہ دونوں ملک ہی ایٹمی ہتھیاروں سے لیس ہیں اور دونوں ہی ایٹمی جنگ کی شدت کو سمجھتے ہیں،رپورٹ

ہفتہ 1 اکتوبر 2016 22:57

پاکستان میں سراجیکل سٹرائیک سے امریکی حکومت پہلے سے آگاہ تھی ،بھارتی ..

نئی دہلی (اُردو پوائنٹ تازہ ترین اخبار۔ یکم اکتوبر - 2016ء) بھارتی میڈیا نے دعویٰ کیا ہے کہ کنٹرول لائن کے دوسری طرف بھارت کے حملے سے امریکی حکومت پہلے سے آگاہ تھی اور اس نے پاکستانی حکومت کو اشارہ دے دیا تھا کہ دہشت گردی کے خلاف جنگ میں امریکہ بھارت کے ساتھ کھڑا ہے۔بھارتی ٹی وی ” اے بی نیوز “کی رپورٹ میں کہا گیا ہے کہ بھارت کے اس حملے سے امریکی حکومت پہلے سے آگاہ تھی اور اس نے پاکستانی حکومت کو اشارہ دے دیا تھا کہ دہشت گردی کے خلاف جنگ میں امریکہ بھارت کے ساتھ کھڑا ہے،بھارتی ٹی وی کا کہنا تھا کہ امریکہ کی طرف سے بھارتی حمائیت سے پاکستان کو ئی بھی جوابی کارروائی کرنے سے پہلے کئی بار سوچے گا کیونکہ بھارت نے پاکستانی حدود میں پہلے حملہ نہیں کیا بلکہ اپنے ملک میں ہونے والی دہشت گردی کے بعد جوابی وار کیا ہے۔

(جاری ہے)

بھارتی ٹی وی کا کہنا تھا کہ موجودہ صورتحال میں پاک بھارت جنگ کے کوئی آثار نہیں ہیں کیونکہ دونوں ملک ہی ایٹمی ہتھیاروں سے لیس ہیں اور دونوں ہی ایٹمی جنگ کی شدت کو سمجھتے ہیں ،لیکن اس کے باوجود مودی حکومت نے عالمی دنیا کو پیغام دے دیا ہے کہ بھارت صرف جوہری ہتھیاروں کی وجہ سے خاموش نہیں بیٹھے گا ،جبکہ مودی حکومت کوشش کرے گی کہ وہ پاکستان سے براہ راست جنگ کی بجائے سندھ طاس آبی معاہدے،پاکستان کو تجارت کے لئے پسندیدہ ملک قرار دینے کا درجہ واپس لینے اور سفارتی سطح پرپاکستان کو تنہا کرنے کے لئے عالمی لابنگ تیز کرنے کو ترجیح دیں گے۔