شیخوپورہ میں مختلف مقامات پر سموگ اور شدید دھند کے باعث ٹریفک حادثات میں ایک شخص جاں بحق ، آٹھ سے زائد زخمی

جمعرات 2 نومبر 2017 13:18

شیخوپورہ(اُردو پوائنٹ اخبارتازہ ترین - این این آئی۔ 02 نومبر2017ء) شیخوپورہ میں مختلف مقامات پر سموگ اور شدید دھند کے باعث ٹریفک حادثات میں ایک شخص جاں بحق جبکہ آٹھ سے زائد زخمی ہو گئے ۔تھانہ صدر مریدکے کے علاقہ خیروپور ملیاں مریدکے روڑ پر شدید دھند اور سموگ کے باعث دو بسوںمیں تصادم کے نتیجے میں سات سے زائد افراد زخمی ہو گئے ۔

(جاری ہے)

اطلاع ملنے پر ریسکیو 1122 نے موقع پر پہنچ کر زخمی افراد کو طبی امداد دیتے ہوئے ڈسٹرکٹ ہیڈ کوارٹر ہسپتال منتقل کر دیا ۔

علاوہ ازیںتھانہ اے ڈویژن کے علاقہ فیصل آباد روڈبائی پاس شرقپور چوک میں مزدا ٹرک درخت کے ساتھ ٹکرا گیا جس سے ڈرائیور شدید زخمی ہو گیا ۔ریسکیو 1122 گاڑی میں پھنسے ڈرائیور کو زخمی حالت میں باہر نکال کر ہسپتال منتقل کر دیا ۔ایک اور حادثہ میں تھانہ ہائوسنگ کالونی کے علاقہ جوئیانوالہ موڑ کے قریب سڑک کراس کرتے ہوئے 40 سالہ فیاض کیری ڈبہ کی ٹکر سے جاں بحق ہو گیا ۔پولیس نے لاش ضروری کارروائی کے بعد ورثاء کے حوالے کر دی۔