ملتان ،ْ طالبہ کا پروفیسر اور ساتھی طالب علم پر ریپ کا الزام

ملتان (اُردو پوائنٹ اخبارتازہ ترین - این این آئی۔ 31 جنوری2018ء) بہائوالدین زکریا یونیورسٹی کی طالبہ نے اپنے استاد اور ساتھی طالب علم پر مبینہ طور پر ریپ کرنے الزام عائد کردیا۔نجی ٹی وی کی رپورٹ کے مطابق متاثرہ لڑکی نے اپنے والد کے ہمراہ مقامی تھانے میں اپنی شکایت درج کرائی۔سپرنٹنڈنٹ پولیس (ایس پی) عمران جلیل کے مطابق متاثرہ لڑکی نے پولیس کو بتایا کہ انہوں نے ایک سال قبل وائس چانسلر زکریا یونیورسٹی کو اپنے ساتھ ہونے والی زیادتی کے حوالے سے تحریری طور پر آگاہ کیا تھا تاہم انتظامیہ کسی قسم کی کارروائی کرنے میں ناکام رہی۔

مبینہ زیادتی کی شکار طالبہ کے والد نے الزام عائد کیا کہ شعبہ سرائیکی کے پروفیسر اور ایک طالب علم نے طالبہ سے زیادتی کی اور اس کی ویڈیو بھی بنائی۔

(جاری ہے)

متاثرہ لڑکی نے بتایا کہ پروفیسر نے انہیں اپنی بیوی سے ملوانے کے بہانے گھر بلایا تھا تاہم جب وہ پروفیسر کے گھر پہنچیں تو وہاں کوئی بھی نہیں تھا۔متاثرہ لڑکی نے کہا کہ پروفیسر اور ساتھی طالب علم نے ان سے زیادتی کرتے ہوئے ویڈیو بھی بنائی تھی۔

انہوں نے اپنی رپورٹ میں 6 افراد کو نامزد کیا اور الزام لگایا کہ ان تمام افراد نے ویڈیو کی بناء پر انہیں بلیک میل کیا ہے۔ایس پی کا مزید کہنا تھا کہ واقعہ کی تحقیقات کی جارہی ہیں اور ابتدائی تحقیقات مکمل کرنے کے بعد مقدمہ درج کیا جائے گا۔ایس پی نے متاثرہ لڑکی کو ملتان میں خواتین کے تحفظ کے لیے مرکوز سینٹر میں منتقل کردیا جہاں ان کا میڈیکل ٹیسٹ کرایا جائے گا اور انہیں قانونی معاونت بھی فراہم کی جائے گی۔