بلاول بھٹو زرداری لاڑکانہ سے قومی اسمبلی کی نشست این اے 200 سے انتخاب لڑیں گے،نثار احمد کھوڑو

لاڑکانہ(اُردو پوائنٹ اخبارتازہ ترین - این این آئی۔ 16 مارچ2018ء) پاکستان پیپلز پارٹی سندھ کے صدر اور محکمہ خوراک کے سینئر صوبائی وزیر نثار احمد کھوڑو نے کہا ہے کہ 2018 کے عام انتخابات میں چیئرمین بلاول بھٹو زرداری لاڑکانہ سے قومی اسمبلی کی نشست این اے 200 سے انتخاب لڑیں گے، نئی حلقہ بندی کے تحت لاڑکانہ کی قومی اسمبلی کی نشست این اے 200 ہوگی، بلاول بھٹوزرداری کی قومی اسمبلی کی نشست میں لاڑکانہ شہر، تحصیل رتودیرو اور عاقل سرکل کے علاقے شامل ہونگے۔

لاڑکانہ میں اپنی رہائش گاہ پر یوسی عہدیداران اور شہر کے شیخ زید کالونی میں دیئے گئے عشائیے سے خطاب کرتے ہوئے نثار احمد کھوڑو کا مزید کہنا تھا کہ بلاول بھٹو زرداری کو لاڑکانہ سے ریکارڈ ووٹوں سے منتخب کرائینگے، 2018 کے اتنخابات بلاول بھٹو کے پہلے اور مخالفین کے آخری انتخابات ہونگے، ہم مخالفین کو چیلنج کرتے ہیں کہ وہ ملک بھر کے مخالف لاڑکانہ میں جمع کریں انہیں اپنے گھروں کے ووٹ بھی نہیں ملیں گے۔

(جاری ہے)

انہوں نے کہا کہ بلاول بھٹو زرداری کے لیے دن رات ایک کرینگے اور بھاری اکثریت سے کامیاب کراکے اسے وزیراعظم بناکر دکھائیں گے۔ نثار کھوڑو کا مزید کہنا تھا کہ جی ڈی اے اور دیگر اتحادوں کی کوئی حیثیت نہیں، سینیٹ انتخابات نے ثابت کردیا کے نوازشریف ناکام ہوچکے ہیں، مجھے کیوں نکالا کے بعد نوازشریف کہیں گے کے اب پارٹی سے کیوں نکالا۔ انہوں نے کہا کہ آئندہ انتخابات میں ن لیگ کو پنجاب میں بھی شکست دیں گے، انتخابی مھم کی شروعات کرلی ہے، مخالفین سن لیں ابھی تو پارٹی شروع ہوئی ہے۔

انہوں نے کہا کہ 4 اپریل کا جلسہ مخالفین کو بوکھلاھٹ کا شکار بنا دے گا بڑے عوامی جلسے صرف پیپلز پارٹی ہی کر سکتی ہے۔ اس موقع پرپیپلز پارٹی کے ضلعی صدر عبدالفتاح بھٹو، جنرل سیکریٹری خیر محمد شیخ، سٹی جنرل سیکریٹری محمد امین شیخ، سٹی اطلاعات سیکریٹری شکیل میمن اور دیگر بھی موجود تھے۔