امریکہ کے وسطی علاقوں میں برفانی طوفان اور بارشیں،پانچ افرادہلاک

منیسوٹا، وسکانسن اور مشیگن کو طوفان بادو باراں کا سامنا ،ہزاروں پروازیں منسوخ کر دی گئیں،امریکی حکام

پیر 16 اپریل 2018 11:59

واشنگٹن(اُردو پوائنٹ اخبارتازہ ترین - این این آئی۔ 16 اپریل2018ء) امریکہ کے وسطی علاقوں میں آنے والے برفانی طوفان اور شدید بارشوں کی وجہ سے نظام زندگی درہم برہم ہوگیا ہے جس کے بعد متعد پروازیں منسوخ کردی گئیں اور سڑکوں پر ہر قسم کی آمدرفت بھی معطل ہو گئی جب کہ مختلف حادثات میں پانچ افراد ہلاک ہو گئے ۔میڈیارپورٹس کے مطابق امریکہ کی شمال وسطیٰ ریاستوں کے بالائی علاقوں میں واقع مناپولس سینٹ پال کے بین الاقوامی ہوائی اڈے پر تمام پروازوں کی آمدو رفت منسوخ کر دی گئی۔

یہ اقدام اس وجہ سے کیا گیا کیونکہ شدید برفباری کے باعث رن وے کو صاف رکھنا مشکل ہو گیا تھا۔حکام کا کہنا تھا کہ تقریباً 470 پراوزیں منسوخ کی گئیں اور مقامی وقت کے مطابق رات 10 بجے کے بعد ائیر پورٹ کا عملہ صرف ایک رن وے کو کھولنے میں کامیاب ہو سکا جبکہ برفانی طوفان کی وجہ سے جنوبی ڈکوٹا کے سب سے بڑے شہر سیوکس فالز کے ہوائی اڈے کو مسلسل دوسرے روز بھی بند رکھنا پڑا۔

(جاری ہے)

حکام نے جنوب مغربی منیسوٹا میں متعدد شاہراؤں کو بند کر دیا اور لوگوں کو کسی بھی قسم کا سفر نا کرنے کی ہدایت کی گئی۔ ریاست کے جنوبی علاقوں میں صورت حال گاڑیاں چلانے کے لیے موافق نہیں تھی۔قومی موسیماتی سروس نے پیش گوئی کی کہ جنوبی منیسوٹا بشمول مناپولس، سینٹ پال میں برفانی طوفان کی وجہ سے 20 انچ برف پڑ سکتی ہے۔بتایا گیا ہے کہ آئندہ 24گھنٹے کے دوران منیسوٹا، وسکانسن اور مشیگن کو طوفان بادو باراں کا سامنا رہے گا جس کے بعد یہ نیویارک اور نیو انگلینڈ کی ریاستوں میں داخل ہو جائے گا۔