ناسمجھ قوتیں لوٹوں کی بنیاد پر ملک،عوام اور ملکی ترقی کیخلاف سازش کررہی ہیں،پارٹیاں تبدیل کرنیوالے کسی کے وفاد ار نہیں ہوسکتے،آئندہ عام انتخابات میں مسلم لیگ ن کا مقابلہ ’’لوٹا لیگ‘‘سے ہوگا، طلال چوہدری

منگل اپریل 00:20

فیصل آباد ۔16 اپریل(اُردو پوائنٹ اخبارتازہ ترین۔ 17 اپریل2018ء) وزیر مملکت داخلہ طلال چوہدری نے کہا ہے کہ 2018ء کے عام انتخابات میں مسلم لیگ ن کا مقابلہ ’’لوٹا لیگ‘‘ سے ہوگا ۔ان خیالات کا اظہار انہوں نے پیپلز پارٹی اور ق لیگ کے لوگوں کی وفاداریاں تبدیل کرنے والوں کے حوالے سے جاری کردہ بیان میں کیا- انہوں نے کہا کہ پارٹیاں تبدیل کرنیوالے کسی کے وفاد ار نہیں ہوسکتے ۔

وفاداریاں تبدیل کرکے مسلم لیگ ن کی کارکردگی اور مقبولیت کا مقابلہ نہیں کیا جا سکتا۔ انہوں نے کہا کہ ناسمجھ قوتیں لوٹوں کی بنیاد پر ملک،عوام اور ملکی ترقی کیخلاف سازش کررہی ہیں۔ یہ مسلم لیگ ن کے ملکی ترقی کے سفر کو روکنا چاہتی ہیں۔ آئندہ الیکشن میں ن لیگ کی کامیابی سے ان کی سازشیں ناکام ہوجائیں گی۔

(جاری ہے)

انہوں نے اپنے بیان میں جڑانوالہ کی سیاست، پیپلز پارٹی اور ق لیگ کے سیاستدانوں اور راہنمائوں کی جانب سے وفاداریاں تبدیل کرنے کے حوالے سے کہا کہ این اے 102میں لوٹے مسلم لیگ ن کی کارکردگی کا مقابلہ نہیں کر سکتے ہیں ۔

آدھی درجن سے زیادہ پارٹیاں تبدیل کرنیوالے ووٹرز کے سامنے اعتماد کھوچکے ہیں۔ انہوں نے کہا کہ آئندہ الیکشن میں میرے مقابل پارٹی امیدوار نہیں بلکہ لوٹے ہونگے۔پی ٹی آئی کی قیادت کو پارٹی عہدیداروں اور کارکنوں میں کوئی بھی اس قابل نہیں ملا کہ اسے الیکشن کے لئے ٹکٹ جاری کر سکیں ۔انہوں کہا کہ ن لیگ عوامی خدمت کی بدولت نہ صرف جڑانوالہ بلکہ ملک بھر میں کامیابیاں حاصل کریگی ۔

مسلم لیگ ن نے جڑانوالہ کے عوام کو موٹر وے ، یونیورسٹی ،ہسپتال ، کارپٹ روڈ اور سٹرکوں کی شکل میں سنہرا مستقبل دیا ہے۔ ساہیانوالہ سے (براستہ کھڑیانوالہ )سید والہ تک ایکسپریس وے، لاہور اسلام آباد موٹر وے کو لاہور کراچی موٹر وے سے لنک کرے گا جس سے علاقے میں انڈسٹریزقائم ہونگی اور روزگار کے مواقع پیدا ہونگے جس سے ترقی اور خوشحالی آئیگی ۔انہوں نے کہا کہ مسلم لیگ ن کی قیادت میں سی پیک منصوبہ کے تحت ترقی کے نئے دور کا آغاز ہوا ہے اور انشاللهیہی قیادت اسکی تکمیل کریگی۔