یمنی فوج سے جھڑپوں میں کمانڈر سمیت 17 حوثی باغی ہلاک ، ملیشیا نے حیس سے سیکڑوں مکین بے گھر کردیئے

بدھ 18 اپریل 2018 10:40

صنعاء ۔ (اُردو پوائنٹ اخبارتازہ ترین - اے پی پی۔ 18 اپریل2018ء) یمن کے شمالی صوبے الجوف کے ضلع المصلوب میں فوج کے ساتھ جھڑپوں میں ایک حوثی کمانڈر سمیت 17 جنگجو ہلاک ہوگئے ۔العربیہ ٹی وی مطابق ذرائع نے کہا ہے کہ المصلوب کے دو علاقوں الساقیہ اور اللاسن میں فوج اور حوثی ملیشیا کے درمیان خون ریز لڑائی ہوئی ہے جس کے نتیجے میں حوثی جنگجوؤں کا لیڈر صادق الحاج بن نسعہ اپنے 7 ساتھیوں ہلاک اور متعدد جنگجو زخمی ہوگئے ۔

مزید 10 حوثی جنگجو اسی ضلع کے پہاڑی علاقے حام میں لڑائی میں ہلاک ہوئے ہیں۔

(جاری ہے)

سرکاری فوج نے اس محاذ پر دو مسلح جنگجوؤں کو گرفتار کیا ہے اور بھاری مقدار میں اسلحہ اور گولہ بارود بھی قبٖضے میں لیا ہے۔ادھر حوثی ملیشیا نے صوبہ الحدیدہ کے جنوب میں واقع شہر حیس کے آس پاس متعدد دیہات کا محاصرہ کر لیا ہے اور وہاں سے سیکڑوں مکینوں کو بے گھر کردیا ہے۔مقامی ذرائع نے بتایا ہے کہ حوثی ملیشیا نے حیس شہر کے شمال اور مغرب میں واقع دیہات کے مکینوں کو جبری ان کے گھروں سے بے دخل کرنے کی مہم شروع کررکھی ہے اور انھوں نے چار دیہات زوبل ، باب اللفج ، بنی العلیلی اور بنی الیر شی سے ان کے مکینوں کو نکال باہر کیا ہے۔ مردوں کو وہ فوجی تربیت کے لئے کیمپوں میں لے جارہے ہیں۔