چیئرمین سٹینڈنگ کمیٹی برائے اطلاعات کا "رنگ دے کوہاٹ"پراجیکٹ پر جاری کا م کامعائنہ

بدھ 18 اپریل 2018 21:02

پشاور(اُردو پوائنٹ اخبارتازہ ترین۔ 18 اپریل2018ء) چیئرمین سٹینڈنگ کمیٹی برائے اطلاعات و تعلقات عامہ خیبر پختونخوا ضیاء اللہ بنگش ایم پی اے نے کہا ہے کہ یہ پہلی صوبائی حکومت ہے جو دارالحکومت سمیت تمام ڈویژنل ہیڈکوارٹرز کی خوبصورتی اورترقی پربلاامتیاز اربوں روپے خرچ کررہی ہے جس کا کریڈٹ پارٹی قائد عمران خان اور وزیراعلیٰ پرویز خٹک کو جاتاہے۔

ان خیالات کا اظہار انہوں نے راولپنڈی کوہاٹ روڈ پر ضلعی انتظامیہ کی زیرنگرانی "رنگ دے کوہاٹ"پراجیکٹ پر جاری کا م کامعائنہ کرتے ہوئے کیا۔ان کا کہنا تھاکہ بلاشبہ بیوٹیفکیشن اینڈ اپ لفٹ پراجیکٹ حکومت خیبر پختونخوا کا قابل تقلید اور انفرادی منصوبہ ہے جس پر مکمل عمل درآمد کے بعد عوام ایک واضح تبدیلی محسوس کریں گے اورشہر باہر سے آنے والے لوگوں کے لئے دلکش اورجاذب نظر بن جائیں گے۔

(جاری ہے)

انہوں نے کہا کہ رنگ دے کوہاٹ پراجیکٹ کا آغاز کوہاٹ کے مین شاہراہ راولپنڈی کوہاٹ روڈ سے کیا گیا ہے جس کے تحت روڈ پر گرین بیلٹ تعمیر کرنے کے علاوہ سٹرک کے دونوں جانب تجاوزات ہٹاکر اس کی خوبصورتی میں اضافہ کرنے کے لئے نجی و سرکاری عمارتوں کی دیواروں پر نقش نگار،،پاکستان سے محبت کے کلمات اور شہر میں آنے سیاحوں کو خوش آمدید کہنے کے لیے خیر مقدمی پیغامات درج کیے جائیں گے۔اس موقع پرضیاء اللہ بنگش نے ضلعی انتظامیہ کی جانب سے شہر کی خوبصورتی کے لئے شروع کیے گے اس پر اجیکٹ کو سراہا اور اس کے لئے اپنے ہر طرح کے تعاون کا یقین دلایا