کم آبپاش علاقوں میں بیر کی کاشت کرنے کی ہدایت

جمعرات 19 اپریل 2018 14:24

فیصل آباد۔19 اپریل(اُردو پوائنٹ اخبارتازہ ترین - اے پی پی۔ 19 اپریل2018ء) محکمہ زراعت نے کہا ہے کہ کم آبپاش والے علاقے جہاں دوسرے پھلدار درخت اگانا ممکن نہ ہو وہاں بیر کو آسانی سے کاشت کیا جاسکتاہے نیزبیر کی کاشت ریتلی اور شور زدہ زمینوں میں بھی کی جاسکتی ہے جس میں بھر پور غذائیت کے علاوہ حیاتین کی مقدار ترشاوہ پھلوں سے زیادہ ہوتی ہے اور غذائی اعتبار سے بیر میں حیاتین الف، ب اور ج کافی مقدار میں پائے جاتے ہیںجبکہ بیر خشک سالی کا اچھی طرح مقابلہ کرسکتاہے اس لئے ایسے علاقے جہاں بارش بہت کم ہوتی ہو وہاں بھی اس کو کامیابی سے کاشت کیا جاسکتاہے۔

محکمہ زراعت فیصل آباد کے ترجمان نے بتایاکہ بیر کا پودا 43 سی50 ڈگری سینٹی گریڈ درجہ حرارت کو برداشت کرسکتاہے اور پودے کو خشک آب وہوا کی ضرورت ہوتی ہے جس کی سب سے بڑی خوبی اس کا خشکی کو برداشت کرنا ہے ۔

(جاری ہے)

انہوںنے بتایاکہ اس کی شاخ تراشی بہت اہم ہے کیونکہ اس کا پھل نئی شاخوں پر لگتاہے اس لیے اس کی نباتاتی افزائش بڑھانے اور نئے پودے کے تنے مضبوط کرنے کے لیے اس کی شاخ تراشی بہت ضروری ہے۔

انہوںنے کہاکہ جب بیر کا پودا بڑا ہوجائے تو باغ میں دوسری فصلوں کی کاشت مشکل ہوجاتی ہے لیکن پہلے پانچ سالوں تک برسیم، سبزیاں اور دالیں اگائی جاسکتی ہیں۔ انہوںنے بتایاکہ بیر پر اکتوبر ، نومبر میں پھول لگتے ہیں اور فروری مارچ میں پھل برداشت کے قابل ہوجاتاہے۔انہوںنے بتایاکہ بیر کے پودے کو سایہ دار جگہ پر نہیں لگانا چاہیے علاوہ ازیں بیر کے پودے پر تمام پھل ایک وقت میں نہیں لگتے اس لیے اس کو توڑنے میں کئی ہفتے لگ جاتے ہیں ۔انہوںنے بتایاکہ بیر کی مختلف اقسام دہلی سفید، کریلا، صوفن وغیرہ ہر طرح کی زمین میں قابل کاشت ہیں۔

Facebook Twitter Google + Share on Whatsapp

کم آبپاش علاقوں میں بیر کی کاشت کرنے کی ہدایت

متعلقہ عنوان :

مزید زراعت کی خبریں