سبزیوں پر بلاجواز سپرے سے جلدی و کینسر جیسے امراض لاحق ہوسکتے ہیں ، محکمہ زراعت

جمعرات 19 اپریل 2018 15:04

فیصل آباد۔19 اپریل(اُردو پوائنٹ اخبارتازہ ترین۔ 19 اپریل2018ء)حکومتی ہدایا ت کی روشنی میں محکمہ زراعت نے سبزیوں پر ماہرین زراعت کے مشورے کے بغیر اندھا دھند سپرے کے باعث جلدی امراض ، کینسر ، اسہا ل ، ماد ہ تولید میں کمزوری سمیت دیگر بیماریوں کے پھیلائو کے خدشات کے پیش نظر فوری کارروائی کرتے ہوئے ان نقصانات کے بارے میں کاشتکاروں اور عوام کو آگاہی فراہم کرنے کی غرض سے خصوصی مہم کا آغاز کر دیا ہے، محکمہ زراعت کے ذرائع نے بتا یا کہ سپرے کے سد باب کیلئے شروع کی گئی اس مہم کے دوران کاشتکاروں کو بتا یا جائیگا کہ وہ سبزیاں اگانے کے جدید طریقوں سے استفادہ کریں اور غیر ضروری طور پر زائد مقدار میں زرعی ادویات کے سپرے سے گریز کیا جائے ،انہوںنے بتا یا کہ اس ضمن میں خصوصی لیکچرز دینے کے علاوہ معلوماتی لٹریچر بھی فراہم کیا جا رہا ہے تاکہ کاشتکاروں میں زرعی ایجوکیشن کا فروغ ہو سکے، بے جا سپرے جہاں ماحول کو آلودہ کرتے ہیں وہیںفائدہ مند حشرات ، شہد کی مکھیاں اور فصل دوست کیڑے بھی تلف ہو جاتے ہیں جبکہ سپرے کے باعث سبزیوں کی غذائیت اور معیار بھی متاثر ہو جاتا ہے، اس مہم کے دوران ایسی ادویات کے سپرے کی بھی سفارش کی جائے گی جن کا اثر صرف 24گھنٹے میں زائل ہو جاتا ہے۔