آغا اسٹیل انڈسٹریز میں جدید ترین SAPٹیکنالوجی کی تنصیب

جمعہ 20 اپریل 2018 17:36

کراچی ۔ (اُردو پوائنٹ اخبارتازہ ترین۔ 20 اپریل2018ء) آغا اسٹیل انڈسٹریز نے اپنی پیداواری صلاحیت کو بین الاقوامی معیار کے مطابق ڈھالنے کیلئے جدید ترینFiori enabled SAP ٹیکنالوجی کی تنصیب کا اعلان کیا ہے۔ آغا اسٹیل انڈسٹریز جدید ترین ایس اے پی ٹیکنالوجی سلوشن کی تنصیب کیلئے ایس اے پی، ارنسٹ اینڈ ینگ، ٹیلی مارکس اور آئی بی ایل یونی سس جیسے اداروں کے تعاون سے کام کر رہی ہے، اس سلسلے میں ایک تقریب کا انعقاد کیا گیا جس میں ایس اے پی، ارنسٹ اینڈ ینگ، ٹیلی مارکس اور آئی بی ایل یونی سس کی سینئر مینجمنٹ نے شرکت کی۔

Fiori enabled SAP ٹیکنالوجی کی تنصیب سے آغا اسٹیل انڈسٹریز اپنی پیداواری عمل کو آسان، مزید موثر اور منافع بخش بنا سکے گی۔ اس ٹیکنالوجی سے کمپنی کی انونٹری لاگت میں 10 سے 15 فیصد کمی آنے کے ساتھ ساتھ پیداواری نقصانات اور حادثات سے بھی بچا سکے گا۔

(جاری ہے)

اس موقع پر آغا اسٹیل انڈسٹریز کے چیف ایگزیکٹو آفیسر حسین آغا نے کہاکہ گلوبل اسٹیل انڈسٹری نہایت تیزی سے ترقی کررہی ہے اور پاکستانی اسٹیل سیکٹر کو بین الاقوامی اسٹیل مصنوعات کا مقابلہ کرنے کیلئے جدید ترین ٹیکنالوجی کو اپنانا پڑے گا۔

انہوں نے کہا کہ ایس اے پی ٹیکنالوجی کے استعمال سے آغا اسٹیل انڈسٹریز اخراجات میں کمی اور بہتر کوالٹی کی اسٹیل مصنوعات بنانے میں کامیاب ہوگی۔ حسین آغا نے کہاکہ ایس اے پی ٹیکنالوجی کی تنصیب سے آغا اسٹیل انڈسٹریز میں کام کرنے والے لوگوں کو استعداد میں بھی اضافہ ہو گا۔ تقریب سے ایس اے پی پاکستان کے کنٹری ہیڈ ثاقب نے خطاب کرتے ہوئے کہاکہ نئے نظام کی تنصیب سے آغا اسٹیل انڈسٹریز کے آپریشنز میں نمایاں مثبت تبدیلی رونما ہو گی اور ادارہ بہتر فیصلہ سازی کرسکے گا۔ اس موقع پر کنٹری ہیڈ ارنسٹ اینڈ ینگ عنایت قریشی اور ٹیلی مارکس کے ترجمان عبدالحسیب نے بھی تقریب سے خطاب کیا اور نئے و جدید آئی ٹی سسٹم کے اغراض و مقاصد پر روشنی ڈالی۔