اچھی کہانی ، جاندار ڈائیلاگ سے ہی فلم کی کامیابی ممکن ہے ‘ قرة العین

لاہور(اُردو پوائنٹ اخبارتازہ ترین - این این آئی۔ 02 مئی2018ء) اداکارہ وماڈل قرة العین المعروف عینی نے کہا ہے کہ جب تک ہماری فلموں کے سکرپٹ اورڈائیلاگ پرتوجہ نہیں دی جائے گی تب تک فلموں کی کامیابی کے ساتھ ساتھ فنکاروں کی مقبولیت بھی ممکن نہیں ہوگی۔ان خیالات کااظہارانھوں نے اپنے ایک انٹرویو میں کیا۔ قرة العین نے کہا کہ دنیا بھرمیں بننے والی فلموں میں سب سے زیادہ اہمیت اسکرین پلے اوراس فنکاروں کے ڈائیلاگز پردی جاتی ہے لیکن ہمارے ہاں بننے والی فلموں میں جدید ٹیکنالوجی تودکھائی دیتی ہے لیکن اس کی کہانی کوجاندار بنانے اورڈائیلاگ کے ذریعے شائقین کوانٹرٹین کرنے کا رجحان فی الحال فروغ نہیں پا سکا۔

جس سے ایک بات ثابت ہوتی ہے کہ کثیرسرمائے اورجدیدٹیکنالوجی فلم کی کامیابی میں کوئی کردارادا نہیں کرتے بلکہ فلم کی کامیابی تواچھی کہانی کے ذریعے ہی ممکن ہوپاتی ہے۔

(جاری ہے)

اگردیکھا جائے توشائقین کواپنی توجہ کا مرکزبنانے کیلیے اس وقت بالی وڈ میں بننے والی ایکشن فلموں میں اس بات پرخاص توجہ دی جاتی ہے کہ ڈائیلاگ جاندارہوں۔ جب کوئی ہیرو اپنے کردارکی ڈیمانڈ کے مطابق ولن کوللکارتا ہے تو وہ ڈائیلاگ راتوں رات سوشل میڈیا پربھی لوگوںکی توجہ کا مرکز بنتا ہے۔

لیکن بدقسمتی کہہ لیں یا عقل کی کمی کہ ہمارے ہاں فلم میکرز ان باتوں پربالکل بھی توجہ نہیں دیتے۔ حالانکہ ماضی کی بات کریں توآج کی نوجوان نسل کو’ مولا جٹ ‘ جیسی فلم کے ڈائیلاگ آج بھی یاد ہیں۔یہی وہ انداز ہے جوشائقین کواپنی طرف متوجہ کرتا ہے۔ اس لیے میں سمجھتی ہوں کہ نوجوان فلم میکرز فلم کیلیے خوبصورت لوکیشنز تلاش کرنے سے پہلے اگراچھے سکرپٹ اورڈائیلاگ پرتوجہ دیں توہمارے سینما گھروں سے بھارتی فلموں کی چھٹی ہوسکتی ہے۔ انھوں نے مزید کہا کہ اس وقت کچھ نئے پروجیکٹس میں کام کی آفرز ہوئی ہیں لیکن میں نے صرف اس لیے انکارکردیا ہے کہ مجھے آئندہ اچھے سکرپٹ اورجاندارکرداروالی فلموں میں ہی کام کرنا ہے۔