اسلام آباد ہائی کورٹ سے کھچائی کے بعد ضلعی انتظامیہ کو ہوش ہو گیا

چیف کمشنر اسلام آباد کی آئی جی اسلام آباد اور ڈپٹی کمشنر اسلام آباد کو طلبی تجاوزات کے حوالے سے متفقہ لائحہ عمل بنا کر کاروائیاں کرنے کی ہدایت

جمعہ 4 مئی 2018 23:17

اسلام آباد(اُردو پوائنٹ اخبارتازہ ترین - آن لائن۔ 04 مئی2018ء) اسلام آباد ہائی کورٹ سے کھچائی کے بعد ضلعی انتظامیہ کو بھی ہوش ہو گیا ،چیف کمشنر اسلام آباد نے آئی جی اسلام آباد اور ڈپٹی کمشنر اسلام آباد کو طلب کر کے تجاوزات کے حوالے سے متفقہ لائحہ عمل بنا کر کاروائیاں کرنے کی ہدایت کر دی۔گزشتہ روز چیف کمشنر اسلام آباد آفتاب اکبر درانی کی زیر صدارت وفاقی دارلحکومت میں تجاوزات کے حوالے سے اعلی سطعی اجلاس ہوا ،اجلاس میں آئی جی اسلام آباد سلطان اعظم تیموری ،ڈپٹی کمشنر اسلام آباد کیپٹن (ر) مشتاق احمد ،ایس ایس پی آپریشن نجیب اللہ بگوی اور ایڈیشنل ڈپٹی کمشنر جنرل کیپٹن (ر) شعیب سمیت دیگر حکام نے شرکت کی ۔

آئی جی اسلام آباد اور ڈپٹی کمشنر اسلام آباد نے چیف کمشنر کو تجاوزات کے حوالے سے بریفنگ دی ۔

(جاری ہے)

اجلاس میں تجاوزات کو ختم کرنے اور کارروائی کے طریقہ کار کا جائزہ لیا گیا۔چیف کمشنر نے اجلاس سے خطاب کرتے ہوئے کہا کہ اسلام آباد کے مضافاتی علاقے ہوں یا پوش ایریا ہر جگہ تجاوزات کی بھرمار ہے ۔آفتاب درانی نے آئی جی اسلام آباد کو ہدایت کی کہ ڈپٹی کمشنر اور ایس ایس پی آپریشن کی مشاورت سے تجاوزات کے خلاف آپریشن کرنے کیلئے طریقہ کار بنایا جائے اور کاروائیناں میرٹ کی بنا پر کی جائیں اور آپریشن میں خلل پیدا کرنے والوں کے خلاف سخت ایکشن لیتے ہوئے ان کے خلاف مقدمات بھی درج کئے جائیں ۔۔۔۔