ملائشیا میں سابق وزیراعظم نجیب رزاق کے ایک اور گھر سے کروڑوں ڈالر برآمد

کوالا لمپور(اُردو پوائنٹ اخبارتازہ ترین - این این آئی۔ 25 مئی2018ء) ملائیشیا میں پولیس نے سابق وزیراعظم نجیب رزاق کے ایک اپارٹمنٹ سے 3 کروڑ ڈالر کی رقم برآمد کر لی۔غیر ملکی میڈیا رپورٹ کے مطابق ملائیشیا کی پولیس نے خفیہ اطلاع ملنے پر ایک اپارٹمنٹ پر چھاپہ مار کر 3 کروڑ ڈالر کی رقم برآمد کر لی ہے یہ رقم اپارٹمنٹ میں بنائی گئی خفیہ جگہوں میں چھپائی گئی تھی۔

اپارٹمنٹ میں مخلتف ڈبوں میں چھپائے گئے زیورات بھی برآمد کیے گئے۔ اپارٹمنٹ سے برآمد کی گئی رقم اور زیورات کے بارے میں پولیس نے دعوی کیا ہے کہ یہ سابق وزیراعظم نجیب رزاق کی ملکیت ہیں۔پولیس کے مطابق چھاپا مار کارروائی سابق وزیراعظم نجیب رزاق کے خلاف کرپشن کے معاملات کی چھان بین کے تحت کی گئی تھی۔

(جاری ہے)

کارروائی خفیہ اطلاع ملنے کے بعد کی گئی تھی جو پچھلی بار سابق وزیراعظم کے گھر پر مارے گئے چھاپے کا تسلسل ہیں جس میں پولیس کو کافی کامیابی ملی ہے۔

شبہ ظاہر کیا جا رہا ہے کہ یہ اپارٹمنٹ سابق وزیراعظم کی ملکیت ہے۔واضح رہے کہ پولیس نے گزشتہ ہفتے سابق وزیراعظم نجیب رزاق کے گھر چھاپا مار کر غیر ملکی کرنسی، زیورات اور قیمتی تحائف کو تحویل میں لے لیا تھا۔ سابق وزیراعظم نجیب رزاق اور ان کی اہلیہ کو کرپشن کے مقدمات کا سامنا ہے۔ ان کے خلاف کارروائی کا آغاز حال ہی میں ہونے والے عام انتخابات میں مہاتیر محمد کی کامیابی کے بعد ہوا ہے۔