بالی ووڈ فلم ’’سنجو‘‘ نے میلبورن ایوارڈز کا میلہ لوٹ لیا

فلم نے 300 کروڑ روپے سے زائد کا بزنس کرکے ریکارڈ بک الٹ پلٹ کردی رنبیر کپور کے ہمراہ منیشا کوئرالہ، سونم کپور،انوشکا شرما اور دیا مرزا نے مرکزی کردار ادا کئے

بدھ 15 اگست 2018 11:50

بالی ووڈ فلم ’’سنجو‘‘ نے میلبورن ایوارڈز کا میلہ لوٹ لیا

میلبورن(اُردو پوائنٹ اخبارتازہ ترین - این این آئی۔ 15 اگست2018ء) بالی ووڈ اداکار سنجے دت کی زندگی پر بننے والی فلم ’سنجو‘ نے باکس آفس پر تہلکہ مچانے کے بعد میلبورن ایوارڈز کامیلہ بھی لوٹ لیا۔سنجو بابا کی زندگی پر بننے والی فلم میں چاکلیٹی ہیرو رنبیر کپور نے بہترین اداکاری کرکے جہاں اپنے گرتے کیریئر کو بلندیوں پر پہنچا دیا وہیں فلم نے بھی بہترین کہانی کی بدولت 300 کروڑ روپے سے زائد کا بزنس کرکے ریکارڈ بک الٹ پلٹ کردی، جب کہ فلم کی کامیابی کا سفر اب بھی جاری ہے اور ’سنجو‘ نے میلبورن میں سجا ایوارڈز تقریب کا میلہ بھی اپنے نام کرلیا۔

بھارتی میڈیا رپورٹس کے مطابق آسٹریلیا کے شہر میلبورن میں ہونے والے انڈین فلم فیسٹیول میں کئی کیٹیگری پر ایوارڈز دیئے گئے جس میں سے سب سے زیادہ ایوارڈز باکس آفس پر راج کرنے والی فلم ’سنجو‘ نے حاصل کئے۔

(جاری ہے)

فلم کے ہدایت کار راجکمار ہیرانی نے بہترین فلم اور بہترین ہدایت کار کے ایوارڈز اپنے نام کئے جب کہ فلم میں سنجے دت کے دوست کا کردار ادا کرنے والے اداکار وکی کوشل نے معاون اداکار کا ایوارڈز حاصل کرکے فلم کو اعزاز سے نواز دیا۔واضح رہے کہ راجکمار ہیرانی کی ہدایت کاری میں بننے والی فلم ’سنجو‘ میں رنبیر کپور کے ہمراہ منیشا کوئرالہ، سونم کپور،انوشکا شرما اور دیا مرزا نے مرکزی کردار ادا کئے ہیں۔