پریگماکے چیف کوآرڈینیٹر اعجازاے کھوکھر کابرآمدی حجم میں اضافہ کے لئے غیر روایتی بین الاقوامی منڈیوں کی تلاش کی ضرورت پر زور

جمعہ 21 ستمبر 2018 14:00

اسلام آباد ۔ (اُردو پوائنٹ اخبارتازہ ترین - اے پی پی۔ 21 ستمبر2018ء) پاکستانی تیار ملبوسات کے تیار کنندگان اور برآمد کنندگان کی ایسوسیایشن(پریگما)کے چیف کوآرڈینیٹر اعجازاے کھوکھر نے برآمدی حجم میں اضافہ کے لئے غیر روایتی بین الاقوامی منڈیوں کی تلاش کی ضرورت پر زور دیا ہے۔جمعہ کو اپنے ایک بیان میں انھوں نے کہا کہ پاکستانی تیار ملبوسات سمیت ملکی برآمدات میں اضافہ وقت کی ضروری ہے اور اس کے لئے ہمیں روایتی منڈیوں کے ساتھ ساتھ غیر ملکی روایتی منڈیوں کی تلاش کی ضرورت ہے جس سے ملکی برآمدات میں خاطر خواہ اضافہ ہو گا اور قیمتی زر مبادلہ ملک میں آنے سے ملکی معیشت کو ایک نئی بلندی اور استحکام ملے گا۔

پریگما کے چیف کوآرڈینیٹر کا کہنا تھا کہ اس ضمن میں برآمد کنندگان کی سہولت کے لئے دبئی اور روٹرڈم میں پاکستان ٹریڈ ہائوس قائم کئے جانے کی ضرورت ہے۔

(جاری ہے)

انھوں نے مزید کہا کہ غیر ملکی کاروباری برادری کی ایک بہت بڑی تعداد کاروباری مقاصد کے لئے دبئی آتی ہے کیونکہ دبئی اس وقت تجارتی اور کاروباری منڈی بن چکا ہے،دبئی میں پاکستانی برآمد کنندگان کے لئے پاکستان ٹریڈ ہائوس کے قیام سے پاکستانی کاروباری برادری کو ان مراکز میں اپنی مصنوعات کی نمائش اور کاروباری معاہدے کرنے کا موقع ملے گا اور مقامی کاروباری افراد پر سفری لاگت کا اضافی بوجھ بھی کم کرنے میں مدد ملے گی۔