کوشش کریں حکومتی پالیسیوں سے عام آدمی پر بوجھ نہ پڑے ،ْوزیر اعظم کی وزیر خزانہ اور وزیر تجارت کو ہدایت

اتوار 14 اکتوبر 2018 19:40

اسلام آباد (اُردو پوائنٹ اخبارتازہ ترین - این این آئی۔ 14 اکتوبر2018ء) وزیراعظم عمران خان نے وزیر خزانہ او ر وزیر تجارت کو ہدایت کی ہے کہ کہ کوشش کریں کہ حکومتی پالیسیوں سے عام آدمی پر بوجھ نہ پڑے۔ نجی ٹی وی کے مطابق وزیراعظم عمران خان سے وزیر خزانہ اسد عمر نے بنی گالہ میں ملاقات کی جس میں مشیر تجارت عبدالرزاق داؤد بھی موجود تھے۔ ذرائع کے مطابق ملاقات میں ملک کی اقتصادی صورتحال پر تبادلہ خیال کیا گیا۔

(جاری ہے)

ذرائع کے مطابق وزیر خزانہ اسد عمر نے آئی ایم ایف سے ہونے والے مذاکرات پر بریفنگ دی، ماضی میں آئی ایم ایف سے لئے گئے قرضوں کی تفصیلات سے بھی آگاہ کیا اور زرمبادلہ کے ذخائر کی صورتحال پر بریف کیا۔ذرائع کے مطابق مشیر تجارت نے برآمدات بڑھانے سے متعلق اقدامات سے وزیراعظم کو آگاہ کیا۔ اس موقع پر وزیرِاعظم نے کہا کہ حکومت ملک کی کمزور معیشت کو سنبھالا دینے کی کوشش کر رہی ہے، کوشش کریں کہ حکومتی پالیسیوں سے عام آدمی پر بوجھ نہ پڑے۔