اقتدار میں آنے کے بعد پاکستان تحریک انصاف کی حکومت کے لیے سب سے بڑا چیلنج اقتصادی بحران سے نمٹنا اور بیرونی ادائیگیوں کو ہینڈل کرنا تھا،وزیر اعظم عمران خان کے کامیاب غیر ملکی دوروں کے نتیجہ میں ملکی معیشت ٹریک پر آ گئی، معیشت اور توانائی معاملات کے ترجمان ڈاکٹر فرخ سلیم کی نجی ٹی وی چینل سے گفتگو

پیر 12 نومبر 2018 02:20

اسلام آباد ۔ (اُردو پوائنٹ اخبارتازہ ترین - اے پی پی۔ 12 نومبر2018ء) معیشت اور توانائی معاملات کے ترجمان ڈاکٹر فرخ سلیم نے کہا ہے کہ اقتدار میں آنے کے بعد پاکستان تحریک انصاف کی حکومت کے لیے سب سے بڑا چیلنج اقتصادی بحران سے نمٹنا اور زیر التوا بیرونی ادائیگیوں کو ہینڈل کرنا تھا۔ اتوار کو ایک نجی ٹی وی چینل سے بات چیت کرتے ہوئے انہوں نے کہا کہ اگست کے مہینے میں ملکی معیشت کے استحکام کے لیے تمام ممکنہ اختیارات پر حکومت اقتصادی ماہرین کے ساتھ مشاورت کر رہی تھی۔

انہوں نے کہا کہ ادائیگیوں کے بحران کے توازن کو کم کرنے کے لیے وزیراعظم عمران خان نے کامیاب غیر ملکی دورے کیے جس سے ملکی معیشت دوبارہ سے ٹریک پر آگئی ہے۔ انہوں نے کہا کہ اس وقت ملک کا کل قرض اور واجبات 30 ٹریلین روپے کے ارد گرد ہے جو آج سے پانچ سال قبل 16.4 ٹریلین روپے تھا۔

(جاری ہے)

ایک سوال کے جواب میں انہوں نے کہا کہ ملک کو درپیش اقتصادی بحران کے پیچھے ایک اہم وجہ منی لانڈرنگ بھی ہے، یہ منی لانڈرنگ جعلی اکائونٹس کے ذریعے کی گئی اور یہ ہمارے قومی اداروں بالخصوص ایف آئی اے کی ذمہ داری ہے کہ وہ ان جعلی اکائونٹس اور انہیں ہینڈل کرنے والوں کا سراغ لگائے۔

افراط زر کے بارے میں پوچھے گئے ایک سوال کے جواب میں ڈاکٹر فرخ سلیم کا کہنا تھا کہ پاکستان تحریک انصاف کی حکومت کوشش کر رہی ہے کہ غریبوں پر زیادہ بوجھ نہ ڈالا جائے اور کم آمدنی والے لوگوں کو زیادہ سے زیادہ ریلیف فراہم کیا جائے۔ انہوں نے مزید کہا کہ 300 یونٹس سے کم بجلی استعمال کرنے والے صارفین کے لیے بجلی کی قیمتوں میں کوئی اضافہ نہیں ہوا۔

عمران خان سے متعلق تازہ ترین معلومات

Facebook Twitter Google + Share on Whatsapp

متعلقہ عنوان :

مزید قومی خبریں