سعودی عرب میں مشرق وسطیٰ کا پر تعیش ترین سینماعوام کیلئے کھول دیاگیا

ریاض (اُردو پوائنٹ اخبارتازہ ترین - این این آئی۔ 17 اپریل2019ء) سعودی عرب جیسی پاک دھرتی میں جہاں گزشتہ سال 35 برس بعد فلموں کی نمائش کی اجازت دی گئی تھی، وہیں ملک کے مختلف شہروں میں سینما گھر بھی کھولے گئے تھے۔سعودی عرب کے وژن 2030 کے تحت آنے والے چند سال میں 100 سے زائد سینما گھر کھولے جانے ہیں اور اس منصوبے پر عمل درآمد کے تحت تیزی سے منصوبے جاری ہیں۔

تاہم اب سعودی عرب میں نہ صرف ملک کا بلکہ پورے مشرق وسطیٰ کا پرتعیش ترین سینما گھر عام عوام کے لیے کھول دیا گیا۔خدیجیہ ٹی وی کے مطابق مشرق وسطیٰ کے پرتعیش ترین سینما گھر کو دارالحکومت ریاض کے کنگڈم ٹاور میں کھولا گیا۔سینما گھر کا افتتاح ارب پتی شہزادے ولید بن طلال نے کیا۔ولید بن طلال نے سینما گھر کے افتتاح کے بعد ٹی وی سے بات کرتے ہوئے ولی عہد محمد بن سلمان کی تعریف بھی کی اور کہا ان کی وڑن کے مطابق سعودی عرب ترقی کی راہ پر گامزن ہے۔

(جاری ہے)

ولید بن طلال نے کھولے گئے نئے سینما کو سعودی شہریوں کی تفریح کے لیے اہم قدم قرار دیا اور کہا کہ اس سے لوگوں کی طرز زندگی میں بہتری آئے گی۔ریاض میں کھولے گئے اس سینما گھر میں 8 اسکریننز نصب کی گئی ہیں جب کہ سینما میں پرتعیش فوڈ کورٹ بھی موجود ہے۔سینما میں بچوں کے لیے خصوصی ہال کا قیام بھی کیا گیا ہے جب کہ ہالز میں جدید طرز کے صوفے رکھے گئے ہیں جو بستر میں تبدیل ہونے کی صلاحیت رکھتے ہیں۔رپورٹس کے مطابق سعودی عرب اور مشرق وسطیٰ کے اس پر تعیش سینما کے ہالز کے اندر لوگوں کو کھانے پینے کی اشیاء بھی فراہم کی جائیں گی۔