بہبود آبادی پروگرام کو اجاگر کرنے کے سلسلے میں ٹی ٹونٹی کرکٹ میچ سپورٹس سٹیڈیم فردوس کالونی جھنگ روڈ میں کھیلا گیا

جمعہ 19 اپریل 2019 22:17

فیصل آباد (اُردو پوائنٹ اخبارتازہ ترین - اے پی پی۔ 19 اپریل2019ء) : ضلعی محکمہ بہبود آبادی کے زیراہتمام بہبود آبادی پروگرام کو اجاگر کرنے کے سلسلے میں پاپولیشن ویلفیئر اور ڈسٹرکٹ سپورٹس ڈیپارٹمنٹ الیون کی ٹیموں کے مابین ٹی ٹونٹی کرکٹ میچ سپورٹس سٹیڈیم فردوس کالونی جھنگ روڈ میں کھیلا گیا۔ایم پی اے فردوس رائے اس موقع پر مہمان خصوصی تھیںجبکہ سابق کرکٹر سعید اجمل،ڈسٹرکٹ سپورٹس آفیسر رانا حماد اقبال،ڈپٹی ڈی او پاپولیشن ویلفیئر طیبہ اعظم،پاپولیشن ویلفیئر آفیسرز تحصیل سٹی وصدر طارق لطیف،میاں بشیر احمد ودیگر بھی موجود تھے۔

پاپولیشن ویلفیئر ٹیم نے ڈسٹرکٹ سپورٹس الیون کو 6وکٹوں سے شکست دی۔ایم پی اے فردوس رائے نے کھلاڑیوں میں انعامات تقسیم کئے اور کہا کہ فیملی پلاننگ پرعملدرآمد اورکم بچے خوشحال گھرانہ کے حوالے سے عوامی آگاہی بے حد ضروری ہے جس کے لئے صحت مندانہ سرگرمیاں منعقد کرکے پیغام کواجاگرکرنا خوش آئند اقدام ہے۔

(جاری ہے)

انہوں نے کہا کہ بہبود آبادی پروگرام کی کامیابی کے لئے تمام طبقات کا تعاون ناگزیر ہے۔ڈپٹی ڈسٹرکٹ آفیسر پاپولیشن ویلفیئر نے بتایا کہ مقابلے منعقد کراکر بہبود آبادی پروگرام کا پیغام عام کیا جارہا ہے ۔انہوں نے ایم پی اے کی آمد کا شکریہ ادا کرتے ہوئے ضلعی محکمہ سپورٹس کے تعاون کو سراہا۔