پنجاب حکومت کا سرکاری افسران کی طویل رخصت کی حوصلہ شکنی کا فیصل

جمعہ 21 اگست 2026 13:00

لاہور (اُردو پوائنٹ اخبارتازہ ترین - این این آئی۔ 21 اگست2026ء) پنجاب حکومت نے سرکاری افسران کی طویل رخصت کی حوصلہ شکنی کا فیصلہ کرلیا، وزیراعلیٰ پنجاب کی ہدایت پر سرکاری افسران کی چھٹیوں سے متعلق نئی ہدایات جاری کردی گئیں۔مراسلے کے مطابق سرکاری افسران کو ایک وقت میں 15روز سے زائد چھٹی دینے کی حوصلہ شکنی کی جائے گی، 15روز سے زائد رخصت صرف حقیقی اور ٹھوس جواز کی بنیاد پر دی جاسکے گی۔

محکمہ سروسز اینڈ جنرل ایڈمنسٹریشن نے تمام انتظامی سیکرٹریز کو ہدایات جاری کردیں، پنجاب بھر کے کمشنرز اور ڈپٹی کمشنرز کو بھی چھٹیوں سے متعلق نئی ہدایات جاری کی گئی ہیں۔متعلقہ محکموں اور خودمختار اداروں کے سربراہان کو بھی حکومتی احکامات پر عملدرآمد کی ہدایت کی گئی ہے۔مراسلے میں کہا گیا کہ طویل مدت کیلئے ایک ہی بار چھٹی لینا سرکاری افسر کے فرائض سے سنجیدگی پر منفی اثر ڈالتا ہے، بلاوجہ طویل رخصت سرکاری افسر کی ذمہ داری اور سنجیدگی سے متعلق منفی تاثر پیدا کرتی ہے۔

(جاری ہے)

پنجاب حکومت کے مطابق ناگزیر اور حقیقی وجوہات کے بغیر 15روز سے زائد چھٹی کی درخواستوں کی حوصلہ شکنی ہوگی۔سرکاری امور میں تسلسل یقینی بنانے کیلئے طویل چھٹیوں کی حوصلہ شکنی کا فیصلہ کیا گیا ہے، وزیراعلی پنجاب کی طویل رخصت سے متعلق ہدایات پر من و عن عمل کرنے کا حکم دیا گیا ہے۔نئی ہدایات پنجاب حکومت کے تمام انتظامی محکموں، متعلقہ حکومتی اداروں اور خودمختار اداروں پر لاگو ہوں گی۔