ہاکی ورلڈ کپ: بھارت نے پاکستان کو 5-3 سے شکست دے دی

گرین شرٹس کا ہاکی ورلڈکپ 2026 کا سفر اختتام پذیر ہوا

اعجاز احمد گوندل جمعہ 21 اگست 2026 14:57

ہاکی ورلڈ کپ: بھارت نے پاکستان کو 5-3 سے شکست دے دی

ہاکی ورلڈ کپ کے پول ڈی کے اہم میچ میں بھارت نے پاکستان کو 3 کے مقابلے میں 5 گول سے شکست دے کر دوسرے مرحلے کے لیے کوالیفائی کرلیا، شکست کے بعد قومی ٹیم کا ورلڈ کپ میں سفر پہلے مرحلے میں ہی اختتام پذیر ہوگیا۔
وگنر ہاکی اسٹیڈیم ایمسٹلوین میں کھیلے گئے میچ میں بھارت نے ابتدا ہی سے جارحانہ انداز اپنایا اور پہلے کوارٹر میں پاکستان پر دباؤ برقرار رکھا۔

بھارتی کپتان ہرمن پریت سنگھ نے پانچویں منٹ میں پنالٹی کارنر پر گول کرکے اپنی ٹیم کو برتری دلائی، جبکہ 11ویں منٹ میں ابھیشیک نے بھارت کی برتری دگنی کردی۔
دوسرے کوارٹر میں بھی بھارت نے حملوں کا سلسلہ جاری رکھا اور ہرمن پریت سنگھ نے ایک اور گول کرکے اسکور 3-0 کردیا۔ ابھیشیک نے 24ویں منٹ میں اپنا دوسرا گول کرکے بھارت کی برتری 4-1 کردی۔

(جاری ہے)

پاکستان نے اس کے بعد شاندار کم بیک کی کوشش کی۔ حنان شاہد نے 22ویں منٹ میں گول کرکے پاکستان کا کھاتہ کھولا، جبکہ سفیان خان نے پنالٹی کارنر پر گول کرکے اسکور 4-2 کردیا۔
دوسرے ہاف کے آغاز میں بھارت کو پنالٹی اسٹروک ملا جس پر ہاردک سنگھ نے گول کرکے بھارت کی برتری 5-2 کردی۔ پاکستان نے ہمت نہ ہاری اور 46ویں منٹ میں حنان شاہد نے اپنا دوسرا گول کرکے اسکور 5-3 کردیا، تاہم قومی ٹیم میچ کے آخری لمحات میں مزید گول کرنے میں کامیاب نہ ہوسکی۔

بھارت نے کامیابی کے ساتھ پول ڈی سے دوسرے مرحلے میں جگہ بنالی، جبکہ انگلینڈ بھی اگلے مرحلے کے لیے کوالیفائی کرگیا۔ پاکستان نے پول مرحلے میں انگلینڈ کے خلاف 4-1 سے شکست اور ویلز کے خلاف 3-3 سے ڈرا کے بعد بھارت کے ہاتھوں شکست کا سامنا کیا۔
پاکستان اور بھارت کے درمیان ہاکی ورلڈ کپ میں یہ 16 سال بعد پہلا مقابلہ تھا۔ اس سے قبل دونوں روایتی حریف 2010 کے ورلڈ کپ میں آمنے سامنے آئے تھے، جہاں بھارت نے پاکستان کو 4-1 سے شکست دی تھی۔
میچ کا نتیجہ:
بھارت 5 — 3 پاکستان
بھارت کی جانب سے ہرمن پریت سنگھ اور ابھیشیک نے دو، دو جبکہ ہاردک سنگھ نے ایک گول کیا۔ پاکستان کے لیے حنان شاہد نے دو اور سفیان خان نے ایک گول اسکور کیا۔