کارڈیالوجی ہسپتال میں ادویات اور علاج کی جدید ترین سہولیات موجود ہیں،

ملتان (اُردو پوائنٹ اخبارتازہ ترین - اے پی پی۔ 29 اپریل2019ء) چیئرمین کشمیر کمیٹی سید فخر امام نے کہا ہے کہ چوہدری پرویز الہی انسٹیٹیوٹ آف کارڈیالوجی ملتان دل کے مریضوں کو تمام تر طبی سہولیات فراہم کر رہا ہے۔ اس جدید ہسپتال میں سپیشلسٹ ڈاکٹروں، تکنیکی لیبارٹریز اور مریضوں کے لئے وافر مقدار میں ادویات موجود ہیں۔ ڈاکٹرز مسیحا ہیں، وہ مریضوں کا مکمل فیڈ بیک اور علاج و معالجے کے معیار کو برقرار رکھیں۔

ان خیالات کا اظہار انہوں نے چوہدری پرویز الہی انسٹیٹیوٹ آف کارڈیالوجی ملتان کے دورے کے دوران گفتگو کرتے ہوئے کیا۔ اس موقع پر ایگزیکٹو ڈائریکٹر ڈاکٹر رانا الطاف، ایم ایس ڈاکٹر زاہد اختر، اور ڈائریکٹر ٹیکنیکل ڈاکٹر فرحان بھی موجود تھے۔ چیئرمین کشمیر کمیٹی کو بریفنگ دیتے ہوئے بتایا گیا کہ اس انسٹیٹیوٹ میں 5 آپریشن تھیٹرز موجود ہیں جہاں پر ملتان، بہاولپور، رحیم یار خان سمیت سندھ اور بلوچستان سے آنے والے مریضوں کو طبی سہولیات فراہم کی جاتی ہیں، 279 بستروں پر مشتمل انسٹیٹیوٹ میں208 ایکسٹینشن ،59 بیڈز ایمرجنسی کے لیے مختص ہیں، روزانہ 300 سے 400 مریضوں کو ایمرجنسی میں اور 1200 مریضوں کو او پی ڈی میں چیک کیا جاتا ہے جبکہ 1500 مریضوں کو روزانہ ادویات بھی دی جا رہی ہیں، 8 سرجریاں روزانہ کی جاتی ہیں جن میں 7 بڑے اور ایک چھوٹے بچے کی سرجری شامل ہے، ساتھ ہی 70 سے 80 مریضوں کی روزانہ انجیوگرافی بھی کی جاتی ہے۔

(جاری ہے)

چیئرمین کشمیر کمیٹی سید فخر امام نے ڈاکٹرز و دیگر سٹاف کی خدمات کو سراہتے ہوئے کہا کہ وہ عوام کی خدمت کر کے آخرت سنوار رہے ہیں۔ انسٹیٹیوٹ میں آنے والے ہر مریض کو بھرپور طبی امداد دیں، شکایات کا فوری ازالہ کریں اور کوالٹی ٹریٹمنٹ کو فروغ دیں، ادارہ کی کارکردگی کو مزید بہتر کر کے اس کا نام روشن کریں۔