قومی کرکٹر آصف علی کی بیٹی امریکہ میں انتقال کرگئی

آصف علی کی بیٹی کینسر کے مرض میں مبتلا اور چند روز قبل ہی علاج کیلئے امریکہ گئی تھی

پیر 20 مئی 2019 13:33

لاہور (اُردو پوائنٹ اخبارتازہ ترین - این این آئی۔ 20 مئی2019ء) قومی کرکٹر آصف علی کی بیٹی امریکہ میں انتقال کرگئی۔قومی کرکٹر آصف علی کی کمسن بیٹی کینسر کے مرض میں مبتلا تھی ،آصف علی کی بیٹی چند روز قبل ہی علاج کے لیے امریکہ گئی تھی۔ آصف علی اس وقت قومی ٹیم کے ہمراہ انگلینڈ میں موجود ہیں تاہم بیٹی کے انتقال کے بعد فوراً پاکستان کے لیے روانہ ہوچکے ہیں۔

(جاری ہے)

واضح رہے کہ آصف علی کی بیٹی گزشتہ سال سے کینسر کے موذی مرض کا شکار تھی، زندگی اور موت کی کشمکش میں مبتلا ہونے کے باوجود وہ اسلام آباد یونائیٹڈ کی جانب سے پی ایس ایل میچز میں کھیل رہے تھے۔دوسری جانب سابق آسٹریلوی کھلاڑی اور اسلام آباد یونائیٹد کے کوچ ڈین جونز نے بھی پی ایس ایل کے دوران کہا تھا کہ آصف علی کی ننھی بیٹی کی طبیعت بہت خراب ہے۔ آصف علی کی بیٹی کے ذکر پر ڈین جونز جذبات پر قابو نہ رکھ سکے اور پریس کانفرنس ادھوی چھوڑ کر چلے گئے تھے۔