سپیکر قومی اسمبلی اسد قیصر نے پیپلزپارٹی کے شریک چیئرمین آصف علی زرداری اور مسلم لیگ) ن (کے رکن خواجہ سعد رفیق کے پروڈکشن آرڈر جاری کر دیئے

جمعرات 20 جون 2019 11:51

اسلام آباد (اُردو پوائنٹ اخبارتازہ ترین - اے پی پی۔ 20 جون2019ء) اسپیکر قومی اسمبلی اسد قیصر نی پیپلزپارٹی کے شریک چیئرمین آصف علی زرداری اور مسلم لیگ) ن (کے رکن خواجہ سعد رفیق کے پروڈکشن آرڈر جاری کر دیے ہیں، سید خورشید احمد شاہ نے پروڈکشن آرڈرز کے اجراء کی تصدیق کر دی ہے جبکہ پیپلز پارٹی کے ذرائع کے مطابق پیپلز پارٹی کے رکن قومی اسمبلی عبدالقادر پٹیل شازیہ مری اور خورشید شاہ کو پروڈکشن آرڈر کے حصول کے لیے قومی اسمبلی سیکریٹیریٹ میں کافی دیر انتظار کرنا پڑا تاہم پیپلز پارٹی کے ذرائع کا کہنا ہے کہ پیپلز پارٹی کے عبدالقادر پٹیل شازیہ مری خورشید احمد شاہ اور دیگر اراکین قومی اسمبلی نے پروڈکشن آرڈرز کی کاپی حاصل کرلی ہے سید خورشید احمد شاہ کا کہنا ہے کہ پیپلز پارٹی کے شریک چیئرمین آصف علی زرداری آج جمعرات کو قومی اسمبلی کے اجلاس میں شرکت کریں گے۔

(جاری ہے)

واضح رہے کہ یہ پروڈکشن آرڈرزقومی اسمبلی کے بجٹ سیشن کے لئی جاری کیے گئے ہیں اور بجٹ اجلاس 29 جون تک جاری رہے گا۔ بعد ازاں قومی اسمبلی سیکرٹریٹ سے جاری بیان کے مطابق سپیکر قومی اسمبلی نے پیپلز پارٹی کے کوچیئرمین رکن قومی اسمبلی آصف علی زرداری اور رہنما مسلم لیگ (ن) رکن قومی اسمبلی خواجہ سعد رفیق کے پروڈکشن آرڈر جاری کر دیئے، پروڈکشن آرڈر قومی اسمبلی میں کارروائی اور طریقہ کار کے قواعد 2007ء کے قاعدہ 108 کے تحت جاری کئے گئے ہیں۔ سید خورشید احمد شاہ کے بعد قومی اسمبلی سیکرٹریٹ نے بھی پروڈکشن آرڈر کے اجراء کے حوالے سے تصدیق کر دی۔