امارات کا فورسز میں کمی کے فیصلے کے باوجود یمن نہ چھوڑنے کا اعلان

دبئی(اُردو پوائنٹ اخبارتازہ ترین - این این آئی۔ 24 جولائی2019ء) جنگ زدہ ملک یمن میں حوثی باغیوں کی جانب سے سعودی عرب پر حملے روکنے کے لیے تیار ہونے کے ساتھ ہی متحدہ عرب امارات نے کہا ہے کہ وہ اس ملک میں تعینات اپنی فورسز کی واپسی کے باوجود یمن کو نہیں چھوڑ رہا۔عرب ٹی وی کے مطابق یو اے ای سعودی اتحادی فوج کا اہم شراکت دار ہے، جس نے 2015 میں یمن میں ایران کے حمایت یافتہ حوثی باغیوں کے خلاف صدر عبدربہ منصور ہادی کی بین الاقوامی تسلیم شدہ حکومت کی حمایت میں مداخلت کی تھی۔

اس سے قبل امارات کی جانب سے رواں ماہ کے آغاز میں کہا گیا تھا کہ وہ یمن بھر سے اپنی فورسز کو کم اور دوبارہ تعینات کر رہا ہے جبکہ فوج پہلے سے امن پہلے کے منصوبے کی طرف بڑھ رہا ہے۔تاہم اب اس معاملے پر یو اے ای کے وزیر مملکت برائے امور خارجہ انور قرقاش نے کہا کہ واضح کردوں کہ متحدہ عرب امارات اور دیگر اتحاد یمن کو نہیں چھوڑ رہا۔

(جاری ہے)

انہوں نے کہا کہ جب ہم الگ آپریٹ کریں گے تو ہماری فوج کی موجودگی رہے گی اور بین الاقوامی قوانین کے مطابق ہم یمن کی مقامی فورسز کی مدد اور مشورہ جاری رکھیں گے۔

انور قرقاش نے کہا کہ حوثی یو اے ای کے اقدام کواس تنازع کے خاتمے میں نئے عزم کے لیے اعتماد سازی اقدا م کے طور پر دیکھیں گے۔وزیر مملکت کا کہنا تھا کہ چونکہ متحدہ عرب امارات نے یمن میں اپنے فورسز کی کمی اور دوبارہ تعیناتی کا کہا لہٰذا ہم اس طرح کریں گے جیسا ہم نے آغاز کیا تھا۔ان کا کہنا تھاکہ یہاں آسان جیت نہیں اور یہاں امن بھی آسان نہیں ہوگا لیکن یہی وقت ہے کہ سیاسی عمل کو دوگنا کیا جائے۔

دوسری جانب حوثیوں کے بڑے سیاسی رہنما مہدی المشاط کا کہنا تھا کہ ان کا گروپ سعودی عرب پر حملے روکنے کے لیے تیار ہے اور مخصوص شرائط پر مذاکرات کیے جاسکتے ہیں۔ان کا کہنا تھا کہ (ہم) میزائل اور فضائی حملے روکنے کے لیے مکمل تیار ہیں اگر دشمن کی جانب سے بھی یہی اقدامات اٹھائے جائیں اور بندرگاہوں کے ذریعے بنیادی امداد کی بحالی میں مدد کی جائے تو پھر ہم سیاسی عمل شروع کرسکتے ہیں۔