پنجاب بھر کی ہائوسنگ سوسائٹیز میں انسداد ڈینگی مہم جاری

لاہور (اُردو پوائنٹ اخبارتازہ ترین - اے پی پی۔ 26 ستمبر2019ء) صوبائی وزیر برائے امداد باہمی مہر محمد اسلم بھروانہ کی ہدایت پر محکمہ کوآپریٹو کی پنجاب بھر کی ہائوسنگ سوسائٹیز میں انسداد ڈینگی مہم مزید تیزکر دی گئی ہے ، اس ضمن میں ضلع لاہور محکمہ کوآپریٹو کی اینٹی ڈینگی ٹیموں نے رجسٹرار کوآپریٹو لاہور جلیل احمد کی قیادت میں واپڈا ٹائون، این ایف سی، انجینئرزٹائون، ویلنشیا ٹائون، نشیمن اقبال، ایمپلائز، اقبال ایونیو اور دیگر کوآپریٹو رہائشی سوسائٹیز میں ڈینگیسرویلنس آپریشن کیا ۔

اس موقع پر سرکل رجسٹرار جلیل احمد نے کہا کہ محکمہ اس وقت اپنے تمام تر وسائل بروئے کار لاتے ہوئے سوسائٹی میںمقیم افراد کو ڈینگی مچھر سے بچانے کے لیے اپنا بھر پور اور فعال کردار ادا کر رہا ہے ، ہماری انسداد ڈینگی ٹیمیں ڈینگی لاروا کی افزائش کے ممکنہ مقامات کو باقاعدگی سے چیک کر رہی ہیں اور نشاندہی پر فوری سپرے کروایا جا رہا ہے۔

(جاری ہے)

انہوں نے مزید کہا کہ اس سارے عمل میں ہمیںمینجمنٹ کمیٹی کابھی تعاون حاصل ہے، ہماری ٹیم جس گھر میں ڈینگی لاروا ملے وہاں کے رہنے والوں کو احتیاطی تدابیر سے متعلق مکمل معلومات بہم پہنچا رہی ہے۔

سرکل رجسٹرار لاہور کا کہنا تھا کہ ڈینگی کی روک تھام سے متعلق آگاہی، واکس اور سیمینارز وغیرہ کے انعقاد کے ساتھ ساتھ سوسائٹیز میں مقیم رہائشیوں میں پمفلٹس تقسیم کیے جا رہے ہیں، اس کے علاوہ سوسائٹی پبلک پلیسز پر اس حوالے سے آگاہی لیکچرز بھی منعقد کیے جا رہے ہیں۔